Ватан дуруччултрал кьинилун ва Авгъаннава совет аьрал буккан бувну 28 шин шаврин хас дурсса мероприятие хьунни ЧIарттал шяраву.

Зулайхат Тахакьаева
Му хIадур дурну дия Лакрал райондалий 2016-2017 шиннардий жагьилтурал политика зузи даврил программалул лагрулий, райондалул администрациялул ОьрчIащалсса ва жагьилтуращалсса даврил отделданул КIулшиву дулаврил ва Магьирлугърал управлениярттащал цачIуну. Мунийн бувкIун бия дуклаки оьрчIру, жагьилтал. Гьуртту хьунни Лакрал райондалул администрациялул ОьрчIащалсса ва жагьилтуращалсса отделданул каялувчи МахIаммад Гадаев, Террорданийн къаршисса отделданул каялувчи Щамххал Сайпуллаев, «Ххяххабаргъ» кказитрал редактор Мусалав Мусалаев, Лакрал ва Ккуллал районнал аьрали коми­ссар ХIасан Масуев, Авгъаннал дяъвилул гьурттучитал – ХIусман Маммаев, Гъапур Оьмариев, Ситтикь Тумалаев, Кирамуттин АхIмадов, Рамазан ХIасанов.
Мероприятие тIитIлатIисса ихтилат­раву МахIаммад Гадаевлул кIицI лавгуна аьралуннавусса къуллугъ биттур буллай жанну дуллуми дакIнийн бичаврищал умуд бихьлай бушиву хъирив нани­сса никгу, хъуними уссурвавран лавхьхьуну, Аьрасатнал аьралуннаву лайкьну къуллугъ буллантIишиврийн.
ХIусман Маммаевлул балжину бувсуна Авгъаннал дяъвилул иширттая. Циван бичин багьлай бивкIссарив совет аьрал тихун ва ци кумаг бувссарив совет аьралуннал Авгъанисттаннал халкьуннан.
Та дяъвилуву гьуртту хьусса 3 500 да­гъусттанлувнава 141-ннал жаназа дуркIун дур. КIиннан ливтIуну махъ буллуну бур Совет Союзрал Виричунал цIуртти, 769 лайкь хьуну ур паччахIлугърал наградарттан. Зана хьуминнава оьрмулул нязаннив дунияллия лавгун ур 600 жагьил, 263 аьс­карнал кьадар тIурча, ссайн бувкссарив хIакьинусса кьинигу кIулну бакъар. Лак­рал райондалия та дяъвилуву гьуртту хьуну ур 25 жагьил.
Ва хьунабакьаврий дуклаки оьрчIан кIул хьунни Авгъаннал дяъвилия цанма ттинин къакIулну бивкIсса чIявусса затру. Миннал дурккунни ватан дуру­ччултран хас дурсса назмурду, увкунни дяъвилул шиннардил балайрду. Дяъвилуву ккаккан дурсса чувшиврун ва ватан дуруччаврин цIа куну хIадур дурну дия выставкагу.