Уттигъанну Каспийскалий 14-мур ДОУ-лий (дошкольное образовательное учреждение) психолог Роза КьурбанмахIаммадовал дирхьунни психокоррекциялул тIиртIусса дарс, цувгу оьрчIал коммуникатив гьунарду итххяххан баврийн тIайла дурсса. Шиккува кIицI лаган, Роза жулва лакку душри.

[responsivevoice_button voice=»Russian Female» buttontext=»ВИЧIИ ДИХЬЛАН»] Ва дарсирай бия шагьрулул УО-лул начальник Людмила Шабанова, УО-лул хъунмур пишакар Асият Аьзизова, ва садикрал хъунмур Луиза Жаркова, шагьрулул школалийн гьаннинсса кIулшиву ва тарбия дулайсса идарарттал бакIчитал ва психологтал.
«Дусшиву – му хъиншивур!» тIисса цIанилусса дарсирай оьрчIру гьуртту хьунни тренингирттавух, оьмуния ва хъинмуния буллалисса ихтилатирттавух. «Инсаннал хасиятрал ххуйми лишанну ва дурсса ххуйсса давуртту итталун захIматну дагьай, оьккимирив най дунара хIисав шай», – кIицI лавгунни Роза КьурбанмахIаммадовал.
ОьрчIал ккаккан дунни ххуйми давуртту – ниттин кумаг баву, игрушкартту датIаву, ччитул оьрчIан за дулаву, дяркъу­сса кIинтнил чIумал лелуххант­ран дуканмур дичаву, къужлун ххуллул тия чулийн ла­хъан кумаг баву. Дарсирай Розал ишла буллай бия тIуркIулулмур ва цаймигу психокоррекциялул журарду.
Дарс къуртал хьуну махъ ххал бивгьунни мунил даража. Шикку бивкIсса педагогтурал бувсунни цалва-цалвами пикрирду. Миннал Роза Кьур­банмахIаммадовал дирхьусса дарсиран лавай­сса кьимат бивщунни. Людмила Шабановал увкусса куццуй: «ЩуркIал хъанай дия оьрчIащалсса даву, чIун дургьуну, цила багьайкун, пишакаршиврул лавайсса даражалий дуллай бушиву». ЧIурчIав дунни ва дарсиравух гьуртту хьун бувцушиврий, хасну ва иширан куну язи бувгьусса оьрчIру ба­къача, укунмасса оьрчIру, цивппагу психологиялул кумаг аьркин хъанахъисса ва умуд бивхьунни укунсса оьрчIащалсса коррекциялул даву гихуннайгу дачин дувантIишиврийн.
Ца-кIива махъ уттигу Роза КьурбанмахIаммадоваяту. Ва бур 1-мур ЦIувкIуллал шярава­сса душ, Каспийскалий мина дирхьусса. Шагьрулул 4-мур школагу ххуйну къуртал бувну, дук­лан бувххун бур Дагъусттаннал паччахIлугърал педагогический университетравун, мугу марцIсса ххювардай къуртал бувну бур. Розал дур ларайсса кIира кIулшиву – психологнал ва логопеднал. Цумусса, хьхьичIун бурувгсса, цилла даву куртIну кIулсса Роза ххирар оьрчIан, архIал зузиминнан.