МахIачкъалаливсса ятинсса ва нитти-буттал кьабивтсса оьрчIансса школа-интернатрал гьану бивзун 56 шин хъанай дур гьашину. ЦIанасса чIумал шикку ялапар хъанай ва дуклай бур 208 оьрчI.
Вай гьантрай шикку лахъа-хъунну кIицI ларгунни интернатрал гьану бивзсса кьини. Тяхъасса, ххарисса оьрчIру чIалай, ххари хъанай бия вай барча бан бувкIсса бусравсса хъамалгу.
Дунияллийсса яла хъунмур тирххандарая — нитти-буттая махIрум хьусса оьрчIру пиш учин бан, тяхъа буккан бан хъунмасса хIарачат бунни ххаллилсса концертращал вайнначIан бувкIсса Дагъусттаннал эстрадалул чанна цIуртталгу.
Ва кьини школа-интернатрал оьрчIру ва учительтурал коллектив барча бан мукунма бувкIун бия Дагъусттаннал УФСИН-лул хъунаманал хъиривчу, виваллил службалул полковник Аьликьади МахIаммадов, вара идаралул кадрардал отделданул хъунама, виваллил службалул полковник Бадруттин ХIусманов, УФСИН-лул пресс-службалул хъунама, виваллил службалул подполковник Амирхан ХIасанов.
Интернатрал актовый залданувун бавтIун бия 7-15 шинавусса оьрчIру, учительтал ва хъамал.
Уголовно-исполнительный системалул зузалтрал барча бунни оьрчIру ва учительтал интернатрал гьану бивзсса кьинилущал, чIа увкунни цинявннан цIакьсса цIуллушиву, тIайлабацIуртту.
Байрандалул кьини школа-интернатран ва миккусса оьрчIан дунни чIярусса бахшишру. Дагъусттаннал УФСИН-лул цала чулуха бахшиш бунни плазменный телевизор. Вайннал барча бунни оьрчIру ва учительтал Дагъусттаннал УФСИН-лул хъунама, виваллил службалул генерал-майор Муслим Даххаевлул цIаниягу.
— Ххирасса оьрчIрув! Школалий ларсъсса кIулшивуртту зун хъинну дучIи лякъинтIиссар гихунмайсса оьрмулуву. Так кIулшивуртту ласунсса хIарачатрайнур зуща зула дакIнийсса мурадирттайн биян хьунтIисса, кьянкьану ччаннай бацIан хьунтIисса. Дуккаврил, кIулшивурттал тIитIинтIиссар ччимур кIанайнсса нузкьунттив, — увкунни оьрчIру барча буллай Аьликьади МахIаммадовлул.
Мероприятие ларгунни лавайсса даражалий, оьрчIругу, хъунимигу кувнная кув рязину.
Дагъусттаннал УФСИН-лул пресс-служба
