Январь зурул 21-нний ссят 14. 04 хьусса чIумал респуб­ликалий, саргъунну зузисса сигнализация дусса муххал ххуллул переездрай, поезд № 4701 (цу­ппалусса локомотив) щуну бур ВАЗ-21140 машиналийн. Хъиривлаявурттал чIалачIи бунни машиналул шупIир М.М. Алмасхановлул (1991 ш.у.) ххуллул низамрал тIалавшиннарду къадурурччушиву.

Мунал, переезд­райсса сигнализациялул ва поездрал машинистнал къадагъа дуллай бунува, миннухгу къулагъас къадурну, машина бацIан къабувну бур. Поезд чIумуйсса (00.22 мин. хьуннин) бацIан бувну бур. Машина ппив-ххив хьуну бур.
Ухссавнил Ккавкказуллал муххал ххуллул каялувчитуран хъунмасса буруккин бутлай бур Дагъусттаннал муххал ххуллул переездирттай нанисса поездирттал мюхчаншиву дузал даврил тагьар ххуйну дакъашиврул.
2016 шинал цинярдагу Ух­ссавнил Ккавкказуллал муххал ххуллул переездирттай хьусса 36 ДТП-лува 10 ДТП (28%) Да­гъусттаннай хьусса дур.
Муххал ххуллул переездирттай поездру машинарттайн щу­сса иширттал хIакъи-хIисав дуллалийни, чIалай бур цинярдагу ДТП-тту АьФ-лул ххуллул низамрал тIалавшиннарду къадурурччусса шупIиртал сававну хьушиву.
Муххал ххуллул переездрайх нанисса чIумал машиналул шупIиртурал ххуллул низамрал тIалавшиннарду къадурурччусса кIанттурду чIявусса хъанай бур. Муния хъуннасса нигьачIаву дур аьрххи-ххуллийн бувкминнан. Поезд кIурабавну, чIявусса инсантал литIун бюхъайссар, гьава чапал хьун бюхъайссар. Переезд­рай хьусса ДТП-ттал мукунма хъунмасса зарал биян буллай бур муххал ххуллун.
Муххал ххуллул переездрай хьусса ДТП-ву 4 инсаннан зарал бивну бур, поездру бацIан бувну бур сайки 7 ссятрай (6.43 мин). ДТП-ттал биян бувсса зарал 213780 къурушрайн бив­сса бур.

ХIурмат бусса шупIиртал!

Муххал ххуллул переезд – му ххуллул яла захIматмур ва нигьачIаву думур бутIар. Ми­кку хъинну личIлулну бикIан аьркинссар, дуруччин аьркинссар ххуллул низам.
Переездрайх бачин нанисса чIумал, машина хIурхIа бачин бара.
Биявайсса поездрал хьхьичIух переездрайх гьан кьаст малахIари. Локомотиврах, мунил фарардал ва прожекторданул чаннах бурувгун поезд цуксса анаварну най бу­ссарив ва му переездрачIан цуксса гъанну буссарив кIул бан къашайссар. БацIан бувну машина, хьхьичI гьан битияра поезд.

ДакIний битияра, поезд цакуну бацIан бан къашай­ссар. Мугьлат бакъа бацIан був­сса чIумалгума поезд 800-1000 метралийх лагайссар.
ПереездрачIан гъан хъана­хъисса ягу переездрайх нанисса чIумал, пассажиртуращал гъалгъа тIий, ххуллухсса къулагъас чан хьун мабацIари.
Ххуллул зуманийх дайгьузанну дакъассар, муниятугу ххишалану личIлулну бикIан аьркинссар машиналий наниминнан.
Хьунив нанисса машинарттал шупIиртурал иттав чани тIайла бацIан мабари. Зувагу, зула пассажирталгу, поездраву нанимигу нигьачIисса тагьарданувун мабутари. Зуятур хъар хъанахъисса аьрххилий бувксса инсантурал оьрмурду ва цIуллу-сагъшиву.
Цаппара минутIирттал цIаний зу ттуршахъул инсантурал бакIрачIан бала-апатIру буцин бюхъайссар.
ЛичIлулну, жаваблувшинна дуну бикIияра, поездран ххуллу итабакьияра.

2016 шинал МахIачкъалаллал региондалийсса муххал ххуллий хьусса ДТП-тту:

Июнь зурул 21-нний Шамхаллая Буйнакскалийнсса ххуллий кьай ласайсса поезд щуну бур «Лада Калина» машиналийн. Ца инсаннан зарал хьуну бур.

Июнь зурул 13-нний муххал ххуллул 2326 километралий (пк 7) Ачи станциялий цуппалусса локомотив щуну бур «Мерседес» машиналийн. Ца инсаннан зарал хьуну бур.

Август зурул 3-нний Сулакьрая Курушливсса ххуллий МахIачкъалалия Москавлив нанисса пассажиртурал поезд машиналийн щуну, 1 инсаннан зарал хьуну бур. Поездру 2.15 минутIрайсса бацIан бувну бур.

Август зурул 10-нний муххал ххуллул переездрай (ПЧ-30) локомотив щуну бур, шупIирнал 2.5 лишандалул тIалавшинна (машина бацIан бан аьркинсса) къадурурччуну.

Октябрь зурул 4-нний Берикейлия Мамедкъалаливсса ххуллул переездрай пассажиртурал поезд (№392) щуну бур «ВАЗ 21140» машиналийн. Ва ишираву щинчIав зарал хьуну бакъар.

Вай циняв ДТП-тту хьуну дур переездирттай саргъунну зузисса сигнализациярду дунура. КIива иш переездрал кьатIувсса кIанттурдай хьуну бур. ШупIиртурал АьФ-лул ххуллул низамрал 15-мур пунктрал тIалавшинна къадурурччуну дур. Вай иширттаву 4 инсаннан зарал хьуну бур. ЛивтIусса бакъар.
Инфраструктуралул МахIачкъалаллал отделданул хъунама С. МахIадов
Лажин хIадур дурссар
А. Аьбдуллаевал