Дагъусттаннал ФСИН-лул управлениялий хьунни балугъравун къабивминнащалсса даврил хIакъиравусса совещание. Шикку ххал бивгьунни щак багьлай, тахсир ккаклай ягу дуснакь бувну УИС-рал идарарттай щябивкIсса, мукунма Къизилюртливсса тарбиялул колониялия аьмсса низамрал исправительный колониярдайн гьан бувсса балугъравун къабивсса мюрщи жагьилтуращалсса даврил масъалартту.
Дагъусттаннал УФСИН-лул вакилтал бакъасса, ва давриву ОН-лайн режимрай гьуртту хьунни СКФО-лул ва ЮФО-лул мукьра региондалул (Къабардин-Балкьарнал УФСИН-лул, Ингушетиянал ОФСИН-лул, Къалмукьнал УФСИН-лул ва Къарачай-Чаргаснал ОФСИН-лул) УИС-рал вакилтал.
КIицI ларгсса регионнаясса танмихIрайн бувцусса балугъравун къабивсса оьрчI-душру гьан байссар Къизилюртливсса тарбиялул колониялийн.
Совещаниялий ххал бивгьунни мукунма кIантту-кIанттурдайсса органнал куннал куннащалсса, хIала-гьурттушиврул масъала. Бувсунни тарбиялул колонияр_ттал ва силистталул изолятордал хIала-гьурттушиврул даву ци даражалий дуссарив. КIицI лавгунни уголовно-исполнительный инспекциярдал, силистталул изолятордал ва тарбиялул колониярдал танмихIрайн кIункIу увманал хIакъиравусса информация ччясса чIумул мутталий куннал кунначIан биян бан аьркиншиву.
Ва хъуннасса къулагъас дан аьркинсса масъала бур, цанчирча чIумуй бувкIсса информациялийн бувну дуснакь бувсса балугъравун къабивсса оьрчI-душваращал миннал хасият, тIул-тIабиаьт кIулну зун бюхълай бур ми Къизилюртливсса тарбиялул колониялийн бувкIсса чIумал.
ОьрчIал хасиятру кIулну дуллалисса чIумал тарбиялул даву ,муния мюнпат ххишаласса бур.
Совещаниялул ахирданий силистталул изолятордал зузалт_райн тапшур бунни щак багьлай ягу тахсирлув буллай дуснакьрайн багьсса балугъравун къабивсса оьрчI-душварал личный делордаву миннал паспортру ягу цайми документру цIакь бувну битан.
