Февральданул 6-нний МахIачкъалаллал администрациялий Муса Мусаевлул каялувшиндаралу шагьрулул сайки циняв къуллугъирттал ва муниципал идарарттал хъуними гьурттусса гьарта-гьарзасса батIаву хьунни. Шикку хьусса агьамми ихтилатругу вара кьини ДР-лул БакIчи Р. АьбдуллатIиповлул Халкьуннал Мажлисрайнсса Рисалалувасса масъаларттан хасъсса бия.
БатIаву тIитIлай, шагьрулул бакIчинал кIицI лавгунни Рисалалувусса цаппара кIанттурду приоритетсса проектру щаллу давриву тIайланма муниципал къуллугъирттал пишакартурайн багьлагьисса бивкIшиву. Цалчинма-цалчин ванал кIицI бувунни Республикалул БакIчинал къулагъас дурсса аьмну республикалулгу, хаснува хъуншагьрулулгу социал-маэшатрал, культуралул, спортрал, жагьилтурал политикалул, жилищно-коммунальный, ххуллул-транспортрал инфраструктуралул ва цаймигу арарду хьхьичIуннай даврицIун бавхIусса мисаллу. М. Мусаевлул мукунма ххи бувунни кIицI дурсса циняр арардаву махъсса кIира-шанна шинал дянив цIа дансса дахханашивуртту хьушиву. Мукунна чIурчIав дурунни вай ккаккиярттал бакIщаращинугу хьушиву кIантту-кIанттурдай жаваблувну зузисса пишакартурал хIарачат.
БатIаврий мукунма ихтилатру хьунни хIакьинусса кьини хъуншагьрулул администрациялул хъуннасса къулагъасралусса, халкь духми къатрава цIуминнувун бизан буллалисса федерал программалиясса. ХIасил, чIурчIав дурунни цIуну дуллалисса къатрал инженер инфраструктура, технический щаллушинна, къатраву яхъанансса халкьуннансса лащу-щаллусса хIаятру дуллалишиву му программалийн бувну. Мукунма бакIчинал кIицI бувунни бакьин буллантIишиву паркру, скверду, къатрал хIаятру ва дакIнийн бувтунни чIал къавхьуну Мирзабековлул, Халиловлул, Кировлул цIанийсса скверду цIу буккан буллай, миннуха зунтIишиву. Мукунссара давурттив дайдишинтIишиву Научный городокрай, Степной поселокрайсса Аьзизовлул цIанийсса кIичIираву, Альбурикентрай, Бухмур Кяхулайрай ва «Октябрьданун 50 шин» тIисса паркравун буххай кIанай. Мукунма батIаврий ххал бивгьунни ливневкарду марцI даврил, ххуллурду бакьин баврил, инвентаризациялул ва цаймигу масъалартту.
