Шяраваллава бивзун нанисса халкь ва цуппа шагьрулий чIявусса оьрчIру буллалавугу хIисавравун лавсун, МахIачкъала хIакьину Ухссавнил Ккавкказуллал шагьрурдаву ккаллийну бур ца яла анаварну хъунма хъанахъисса шагьрулун. Масалдаран, 2016 шинал хъуншагьрулий 11 772 оьрчI бувну бур, 2015 шиналнияр 1500 оьрчI ххину.
З. АьбдурахIманова
Шагьрулул КIулшивуртту дулаврил управлениялул хIасиллайн бувну, махъсса 3-4 шинал дяниву шагьрулул школардайсса оьрчIал ккал цакуну лахъ хьуну дур. Масалдаран, 2016-2017-ку шинал шагьрулул школардай ккалай бусса бур 74 616 оьрчI, хIасил 2015-2016-ку шиналнияр 3 638 оьрчI ххину. Ва бакъасса, оьрчIал садикирттавунсса электрон очерданийгу бусса бур 7 шин хьун дурасса 32 222 оьрчI.
Ванийн бувну, аьлтта чIалай бур хъуншагьрулий детсадру биял къахъанай бушиву ва школардайгу дуклаки оьрчIан къуману бушиву. Школарду, садикру бувансса аьрщивгу шагьрулун диял къахъанай дусса дур. Аммаки шагьрулул каялувшинна ва масъала дузал бансса мурадирттах луглай бур.
МахIачкъалаллал бакIчинал хъиривчу Запир Алхасовлул бусаврийн бувну, ва ишираву хъунмасса кумаг хьун тIий бусса бур «Билдинг-сад» тIисса социал проектрая. Цил гьанугу хIукумат чIарах дацIаврийну бивзсса. «Билдинг-сад» проект сававну бюхъан тIий бусса бур жямат гьурттусса ишбажаранчишивугу машгьур дан, щурущи дан.
Ва проект щурун дикIаврия духхинтIиссар строительстварттал компанияртталгу, ишбажаранчитуралгу ва яла-яла шагьрулул халкьунналгу. ХIасил, халкьуннаща бюхъантIиссар, архну къазанай, цала къатрал, давурттал чIаравсса садикирттавун оьрчIру булун, застройщикнаща бюхъантIиссар цала харж дурмур махъуннай зана дан ва ишбажаранчинаща бюхъантIиссар халкь давурттал дузал бан. Ттинин укунсса проектру щаллу дурну дусса дур халкь гьарзасса, къатри, идарартту бан аьрщив диял къахъанахъисса Аьрасатнал цаппара шагьрурдайгу. Проектрал гьарца хIакъи-хIисаврая «Об образовании» тIисса закондалий бувсун буссар. Вице-мэрнал бусаврийну, проект щурущи дан бакIрайн ларсманаягу хIукуматрал чулухасса цаппара захIмат дакъасса тIалавшиннарду дусса дур. Детсадрансса субсидирование дуван хьхьичIгу хIасул байсса бур шагьрулул ца_ппара къуллугъирттал вакилтал гьурттусса, вай давурттал ялув бацIансса, хасъсса комиссия.
Шагьрулул бакIчинал къулбасралусса проектрал хIакъиравусса сиптардал дайдихьу дуван ихтияр дуллалисса хIукмугу бувккун бур ва шинал январьданул 18-нний.
Шагьрулул каялувшинна тавакъю буллай бур МахIачкъалаллал бизнес-сообществалухь ва укунмасса ишбажаранчитурахь, проектравух гьуртту хьира, хIала буххияра тIий. Цивппагу хIадурну бур мукунсса даву цала бакIрайн ласун хьхьичIун бувкминнан кумаг бан, чIарах бацIан.
