Январь зурул 31-нний МахIачкъалалив хьунни «Жул участковый» тIисса республикалул форум. Форумрал давриву гьур­тту хьунни республикалул БакIчи Рамазан АьбдуллатIипов.

Андриана Аьбдуллаева
Мероприятие дайдирхьунни къуллугърал бурж биттур буллай жанну дуллусса ихтиярду дуру­ччай органнал зузалтрал аьпалун минутIрайсса пахъ багьаву дурну.
Хъирив ихтилат бунни Рес­пуб­ликалул БакIчи Рамазан Аьбду­ллатIиповлул. Ванал кIицI лавгунни республикалий законну ва низам дуруччаву мурадрай Дагъус­ттаннал полицайтурал ляхълахъисса чаранну ва му даврил агьамшиву.
— Полициялул участковый уполномоченный ур агьалиначIан яла гъанма инсан, цанчирча кIантту-кIанттурдайсса агьалинал буру­ккинтталсса буллалима, ми хьунабакьлакьисса масъаларттал хъирив уклакима участковый ур. Мунал даврих бурувгунни агьалинаву властьрал хIакъиравусса пикрирду хIасул шайсса. Ххуйсса полицейский акъассагу, участковый икIан аьркинссар гражданингу, дипломатгу, цала участокрайсса низамрал къаралчигу.
Низам дишин къашайссар агьалинал цала гьурттушинна дакъа.
Яла захIматмур чIумал жува ихтиярду дуруччай органнайн буклай буру. Ттул пикрилий, республикалул каялувчитуран миннал даврил агьамшиву бувчIлачIаврийну ва щалагу Виваллил иширттал министерствалул даврин лавайсса кьимат бищаврийну агьалинал полицайтурахсса бургаву мархлуцIакул даххана хьунни.
Жуща бювхъунни цачIуну зун. Укун зузаврил хIасиллугу ххуй­сса хьунни. Промышленность хьхьичIуннай даврил индексрах бурувгун, жува Аьрасатнаву цалчинмур кIанай буру. Жу цIакь дарду паччахIлугърал власть, цIу буккан барду региондалийсса каялувшиндарал даража, — увкунни Республикалул БакIчинал. Цала ихтилатраву Рамазан АьбдуллатIиповлул мукунна кIицI ларгуна ихтиярду дуруччай структурардал зузалтрал чувшиву.
— Махъсса мукьра шинал чIала­чIи бунни жущава, Дагъусттаннал халкьгу, властьгу, ихтиярду дуру­ччай органнугу цачIуну, жула респуб­ликалий низам дишин ва шикку­сса тагьар ххуй дан бюхъантIишиву. Ва даву уттиния тихуннайгу хьхьара хьун ритан къабучIиссар. Шиккугу хъунмур бияла агьалиначIан гъан­сса, миннал буруккинттаха зузисса участковыйнахь буссар, — увкунни Рамазан АьбдуллатIиповлул.
Ванал кIицI бунни Дагъусттаннай аьмсса тахсиркаршивуртту дянивну билаятрай хъанахъиминнух бурувгун цаппарассалила чансса душиву, ДР-лул виваллил ишир­ттал министргу АьФ-лул регионнал министртураву ца яла хьхьичIунма ушиву.
— Полициялул зузала МахIаммад НурбахIандов ва мунал уссу бивтун бивчуну махъ Дагъусттаннай цаягу инсан къаливчIунни террористурая вирттал буллалисса. Дагъусттан бакъассагу, щала билаят хIайран бунни полициялул зузалал къучагъшиврул. «Зузияра, уссур­вал!». Дахьва вай кIива му­къул рищаву дунни къачагътурайх. МахIаммад НурбахIандовлул оьвчаву так ца полициялул зузалтрайнсса дакъар. Жува, гьарица инсан, жула-жула кIанттурдай ва оьвчаврин лав­хьхьуну зун аьркинссару, — увкунни Республикалул БакIчинал.
Хъирив региондалий тахсиркаршивурттан ххуллу кьукьин ляхълахъисса чаранная бусласисса ихтилат бунни Дагъусттаннал виваллил иширттал министр Аьвдурашид МахIаммадовлул.
— ТIулдакъашивурттан ххуллу кьукьавриву хъунмасса бияла бу­ссар участковыйтурахь. 2016 шинал миннал ашкара дурссар 5161 тахсиркаршиву, увгьуссар органну луглай бивкIсса 307 тахсиркар, ялун личин дурссар 62 азарда административ тIулдакъашивуртту, ххал бивгьуссар агьалиная бувкIсса 15 азарва аьрза.
Му бакъассагу, кIанттул администрациярдал бакIчитурал цIаний гьан дурну дур 1905 представление. Гьарица кьини ттуршахъул участковыйтурал, кIантту-кIанттурдай низам ва жяматрал мюхчаншиву дуруччаву мурадрай, хъуннасса даву дуллай бур. Участковыйтуран хъуннасса хъар лархъун зун багьлай бур. Ца-ца чIумал бувагу ми хъанай бур кIантту-кIанттурдайсса властьрал вакилтал, — бувсунни виваллил иширттал министрнал. Ванал бусласимунийн бувну, чIявумур чIумал агьалинал багьана бакъасса участковыйтурай аьй-бювкьурду буллалисса кIанттурду хьунабакьлай бур. Мунийн бувну, участковыйтурал даврицIун бавхIусса масъалартту ччя-ччяни ххалбигьлай бур МВД-лул коллегиярдай ва совещаниярдай. Луглай бур миннал даврил даража гьаз бансса чараннах.
— Щала жаваблувшинна участ­­ковыйтурайн хъар давугу къатIайлассар. Миннан кIанттул администрациярттал бакIчитурал кумаг ва чIарав бацIаву аьркинни. Мигу участковыйтал кунма жаваблувссар цивппа каялувшиву дуллалисса кIанттурдай жяматийсса низам дузал давриву. Амма кIанттул властьрал закондалул ххуллий цала щаллу бан аьркинсса ми бигарду тачIав цала бакIрайн ласлай бакъар, — увкунни Аьвдурашид МахIаммадовлул.
ДР-лул ХIукуматрал председатель Рамазан ЖахIпаровлухьхьун махъ буллай, Республикалул БакIчинал тапшур бунни мунайн тахсиркаршивурттан ххуллу кьукьавриву ва экстремизмращал, терроризмращал талатавриву участковыйтурал ва кIанттул властьрал органнал дахIаву, хIала-гьурттушиву цIакь даврил хIакъиравусса хIукму хIадур бан.
— Ва документраву ккаккан бувну бикIан аьркинссар цинявппагу кIицI лавгсса масъалартту ва му жула уртакьшиврул гьануну хьун аьркинссар. Мунийну дузал хьун аьркинссар участковыйтурал давринсса, дружинарду зунсса къулай­сса шартIру, — кIицI лавгунни Рамазан АьбдуллатIиповлул.
Вице-премьернал бувсунни мукунсса хIукму хIадур бансса гьану бушиву.
— Дагъусттаннай зий дур «О полиции», «Об участии граждан в охране общественного порядка», «Об основах системы профилактики правонарушений» федерал законну. Мукунна зий дур Да­гъусттанналми законну, цаппара Да­гъусттаннал ХIукуматрал постановленияртту ва программарду. Вайннуйн чул бивщуну хIадур банну цIусса документ, — увкунни Рамазан ЖахIпаровлул.
Дагъусттаннал прокурорнал хъиривчу Сергей Беляковлул бувсунни Аьрасатнал ва регионнал законну тIулдакъашивуртту хьун къаритаву мурадрай субъектирдай цукун щаллу дуллай бурив ккаккан ялув бавцIуну бушиву прокуратуралул зузалт.
Республикалул прокуратуралул сипталий экстремизмалул ишир­ттан ххуллу кьукьаву мурадрай кьамул дурну дур «О народных дружинах в Республике Дагестан», «О профилактике экстремистской деятельности в Республике Дагестан», «О межнациональных отношениях в Республике Дагестан» законну.
— Ихтиярду дуруччай органнал, кIанттул цала каялувшиндарал органнал, жяматийсса ва диндалул организациярдал хIала-гьурттушиву цIакь даву мурадрай, сентябрь зурул 12-нния байбивхьуну, октябрь зурул 12-ннийн бияннин (2016 шинал), республикалий хьуссар «Дагестан против терроризма – Родина дороже» цIанилусса месячник. КIицI ларгсса органнал ва организациярдал цачIусса хIарачатрайну бювхъунни чан дан кIусса ва ляличIинура оьхIалсса тахсиркаршивуртту. Миннува инсан ивкIусса ишру – 6,3%-рал, къачагъшивуртту – 29,9%-рал, хъямалашин дурсса ишру – 5,4%-рал, закондалуцIун къабавкьуну наркотикру, психотропный затру ва миннул аналогру ишакаш буллалисса ишру – 18,3%-рал. (3140-нния 2536-ннийн бияннин).
Форум къуртал хьунни къуллугърал бурж дакI марцIну бартбигьлагьисса полициялул зузалтран наградартту дулаврийну.
Рамазан АьбдуллатIиповлул дуллунни полициялул зузалтран ДР-лул ХIурматрал грамотартту, Барчаллагьрал чагъарду ва Республикалул БакIчинал цIа кусса ссятру.
Форумрал хIасиллайн бувну кьамул дурсса резолюциялий чивчуну бур: «Форумрай гьуртту хьуми, республикалий экстремизм ва терроризм ппив хьуну нанаврия буруккинттарай, хIадурну бур властьращал ва обществалущал архIал низам ва жяматрал мюхчаншиву дуруччаврил цIаний, чIяву миллатру бусса Аьрасатнал аслийсса аьдат­ру дуруччаврил цIаний, Аьрасатнал халкьуннал дусшиву ва цашиву цIакь даврил цIаний шайсса хIарачат буллан».