Февраль зурул 1-нний Хасавюртуллал шагьрулул администрациялий агьали кьамул бунни Аьрасатнал ПаччахIлугърал Думалул депутат МахIрамов Аьвдулмажид Варислул арснал. Вара кьини Хасавюртлив МахIрамов ивунни шагьрулул хъунмур азарханалийнгу.
И. Саидова
ДепутатначIан бувкIсса халкьуннал сукку бунни тамансса цIурувкьюсса масъалартту.
Шагьрулувунсса ца яла агьаммур ва хъунмамур ххуллу бакьин буван кумаг бува тIий увкIун ия «Олимпийский» тIисса, Хасавюрт шагьрулувун духлахисса поселокрай ялапар хъанахъисса Висради Ошитов. Ванал бувсунни ва ххуллий кьакьри дагьну, хаснува гъараллу дусса чIумал, машинартту гъагълай, агьали азурда хъанай бушиву.
Агьамсса масъалану бия ялагу, Хасавюртлив бухлахисса, муххал ххуллул чIаравсса ххуллучIа машинартту салкьи хъанай, шагьрулувун буххан хъунмасса хIал хъанай бушивриясса. Ва масъалалул хIакъираву бусан увкIун ия «Спецавтохозяйство» ООО-лул каялувчи.
Хасавюртуллал шагьрулул мэриялул инвестициярттал отделданул хъунама Нуцалханов ХIасаннул кIицI бунни ччюрк ссайнкIуй дуккан дуллалисса завод баврил масъала.
Аьвдулмажид МахIрамовлул бувсунни агьалинал гьаз бувсса масъаларттал хъирив лавну, ми щаллу бувансса чаранну лякъинтIишиву.
Агьалинал масъаларттах вичIи дирхьуну махъ чирилунсса аьрххилущал Аьвдулмажид МахIрамов лавгунни Хасавюртуллал шагьрулул хъунмур азарханалийн. Цала чулуха ванал азарханалун кумагран дуллунни щавурду дахIайни аьркин данмур, пеленкартту ва цаймигу медициналул кьай-кьуй.
Аьвдулмажид Варисовичлул барчаллагь увкунни агьали кьамул бансса шартIру дузал дурсса Хасавюртуллал шагьрулул администрациялухь.
Ванал мукунма барчаллагь увкунни цала аьрххилул чIарав бавцIусса кумагчитурахь: МГИМО-рал студент Умаханов ХIажимурадлухь ва Пироговлул цIанийсса РНМИМУ-рал студент МахIаммадов Шамиллухь.
