Январьданул 27-нний Каспийскалий Аьрасатнал халкьуннал аслийсса культуралул центрданий хьунни Ленинградуллал блокадалун 73 шин шаврицIун дархIусса батIаву. Мунивух гьур­тту хьунни шагьрулул 6-мур ва 9-мур школарттал дуклаки оьрчIру, мукунма культуралул ва жагьилтурал политикалул отделданул хьхьичIунсса пишакар Мурад МахIаммадов, ЦБС-лул методист Зугьра Давудова, 6-мур школалул педагог Ххадижат Бечедова ва 9-мур школалул библиотекарь Светлана Гьилатова.

Бадрижамал Аьлиева
БатIаву дайдирхьунни ва Центрданул директор Башикар Вагьабовал. Мунил бавтIминнан дакIнийн дуртунни жулва билаят­рал тарихравасса ххари да­къасса дата – январьданул 27-нний кIицI лагайсса Аьрасатнал аьрали славалул Кьини – Ленинград совет аьра­луннал, немецнал фашистурал ххяппурттаща зевххуну, блокадалува щаллуну буккан бувсса кьини. Бувсунни блокадалул ппурттуву оьрчIал бакIурдичIан цикссагу баларду бувкIшиву, ккашил, дякъил къия дурхIушиву миннал, цикссагу оьрчIру ливтIушиву артобстреллу, ккаши, дяркъу сававну. Цилва ихтилатраву Башикар ХIасановнал чIурчIав дунни хъуннасса агьамшиву душиврий билаятрал, халкьуннал тарих кIулну бикIаврил, совет халкьуннал чувшиву, виричушиву хъамакъаритаврил ва дунияллийсса паракьатшиву дуруччаврил, цихлугу жулва халкьуннал ххишала бакъа хъунмасса багьа буллусса.
Центрданул зузала Сабина ТIагьировал бувсунни Хъунмасса Буттал КIанттул цIанийсса дяъвилул шиннардий совет халкьуннал циксса бувхIуссарив, Ленинградуллал блокадалул 900-гу гьантта цукун захIматсса бивкIссарив, му хьушиву ва дяъвилул ца яла оьхIалмур, рахIму бакъамур ишну.
Ккаккан бунни Ленинград шагьрулул блокадалул документал кадрарду. БатIаврий бувккунни Анна Ахматовал ва Ольга Берггольц­лул шеърирду. Ахирданий цинявнналагу ххал дунни Ленинградуллал блокадалун хасну хIадур дурсса луттирдал выставка.