Уттигъанну Каспийскалий ЧIава натуралистътурал станциялий хьунни «Дагъусттаннал экологиялул масъалартту оьрчIал янилу» цIанилусса республикалул конференциялул муниципал этап. Му дайдишин хьхьичI официал тагьарданий тIиртIунни Экологиялул шин.
Бадрижамал Аьлиева
Ва батIавривух гьуртту хьунни шагьрулул УО-рал методистътал Тамара Аьлиева ва ПирахIмад ЯрахIмадов, «Да­гъусттаннал» заповедникрал директорнал хъиривчу Зарипат МахIаммадова, му заповедник­рал хьхьичIунсса пишакартал Мариян МахIаммадова ва Светлана Ченцова.
Шадлугъ тIиртIунни СЮН-далул (Станция юного натуралиста) методист-сакиншинначи Зарема НурмахIаммадовал.
— Кьуния цалчинмур ттуршукулий кIилчинни Аьрасатнал Федерациялул Президентнал шин хас дувайсса тIабиаьтрал ва лагма-ялттумунил масъаларттан, тIабиаьт дуруччаврин. Ва хъанахъиссар Аьрасатнаву экология паччахIлугърал политикалул ца агьамсса бутIану душиврул ца яргсса чIалачIинну, — увку­н­ни ванил.
Гихунмай махъру лавхъунни ЧIава натуралистътурал станциялий тарбия ва кIулшивуртту ласласисса оьрчIал.
— Инсаннал дурсса хъуни-хъунисса ккаккиярттал махъ бав­цIуну буссар хъунисса масъаларттугу, миннувасса чIявумигу – экологиялулми, — буслай бия оьрчIру цуксса хъуннасса агьамшиву дуссарив экологиялул культуралул гьарцагу инсаннал оьрмулувугу, аьмну республикалул, щалагу дунияллул лагрулийгу.
Махъ лавхъунни СЮН-далул директор Зинаида СалихIовал. Ванил чIурчIав дунни аьрасатлувнан мархлуцIакул даххана дуван аьркиншиврий тIабиаьтрахсса, лагма-ялттумунихсса бургаву.
— Жулла республикалий щюллишиву дугьаврил масъала хъинну ххуй дакъасса тагьарданий бур, къатри буллалаву анавар­сса бущилий най дур, буллалисса къатри чIяву хъанахъаврищал, чан хъанай бур щюллишиву дугьансса кIанттурду. Вай цимурца сававну инсан ссихI ласунмур дакъа личIан бюхъайссар, — увкунни ванил.
Конференциялий гьуртту хьунни шагьрулул школардал дук­лаки оьрчIру. Муний ххал бигьлагьисса масъаларттавух бия тIабиаьтран, лагма-ялттусса аралун полиэтилендалул кьуцур­ттая биллалисса заралдануцIун, кирпичру бай заводирттал гьава чапал буллалаврицIун, АЗС-рдаясса нигьачIаврицIун, жура хIачIлачIисса щинацIун бавхIусса масъалартту. Дуклаки оьрчIал бувсунни экологиялул тагьар къулай дуван, тIабиаьт дуруччин цалла ва цащала архIал дуклакиминнал ци-ци давуртту дуллай буссарив. Конференциялул хIасиллайн бувну язи дургьунни шанна даву – респуб­ликалулмур конференциялий гьуртту хьунсса: Диана Мустапаевалсса (гимназия), Марат ХIажиевлулсса (СЮН, «ТIабиаьт дуруччаву» сакиншинна) ва Саржият МахIаммадовалсса (8-мур лицей). Шиккува кIицI лаган, Марат ХIажиев ур лакку оьрчI, 1-мур ЦIувкIуллал шяравасса.
Конференциялий личIинура кIицI ларгунни ва конференциялувух гьуртту хьусса Амирхан Буттаевлул (шагьрулул 6-мур школалул дуклаки оьрчI) даву.