Лаура Оьмарова, студент душ.
— Ларгсса нюжмар ва мунияр хьхьичIсса гьантри дакIний ливчIунни ттун ххуйсса мар­ххалтту бувну. Сант дирирну дунура, на туристуращал лавгссияв Ахъушиял райондалийсса, 2498 метралул лахъшиврийсса «Чиндерчеро» базалийн бигьалаган.

КIинтнил яла бявкъумур февраль зуруй зунттаву дяркъу дикIанссар тIий, хъинну гъилину яннагу ларххун лавгссияв. Шагьрулий жучIара дяркъу дунугу, зунттаву гъилишиву дия, хIатта кIири бичлай, яннарду ликлайгума бивкIру. МахIаттал хьуну бивкIра няй-няй тIий бивт­сса бургъилу марххала баслай бакъашиврий. «Чиндерчеро» база цуппагу бувну бия туристуран къулайсса цинярда шартIру хIисавравун ларсун. КIикку бия ххаллилсса дукрарду ду­сса кафе ва ресторан. Бия архсса кIанттурдава бувкIсса инсантал бацIансса гостиница.
ЧIявуми, нава кунма, цалчин лыжардай бацIлацIисса бия. Му иш хIисавравун лавсун, лыжардай тIайлану бацIан ва бигьин­сса куц ккаккан буллалисса инструкторталгу бия. Шилава най бунува пикрирдай буссияв, мар­ххалттанивух зунттул бакIрайн цукунни лахълантIисса тIий. Му чулухагу агьалинан къулайшиврун бувну бия зунттул бакIрайн инсантал гьаз буллалисса караматсса мяйва ххуллу. Жу кIикку кIул хьуру, дустал хьуру чIявусса инсантуращал, рищарду дакIний личIансса суратру. БувкIру махъунмай хъамакъабитайсса тIааьнсса асардащал.

Юнус ХIусайнов, дарс­дихьу:
— Ларгсса нюжмардий хьу­сса иширттава ттуйн хъунма­сса асар биян бунни Аьрасатнал Президент Владимир Путиннул жагьил­сса аьлимтурал 2016 шинал элмулул аралуву дурсса цIушиннардахлу премияртту дулаврийну. 2008 шинал хIасул дурну дур техникалул, гуманитариялул элмулуву дур­сса ххал дигьавурттахлу ва цинярдагу элмурдал арардаву дурсса цIушиннардахлусса Президентнал премия ва муния шихунмай му дуллай байбивхьуну бур Аьра­сатнал элмулул байрандалул кьини. Жагьилсса аьлим­турал дурсса шанттуршлийсса элмийсса ххал дигьавурттава гьашину Президентнал премиялул лауреатътал хьунни физикалул, математикалул, медициналул элмурдаха зий ивкIсса мукьа жагьил. ХIайран унна жагьилсса аьлимтурал ядерный физикалул ва лавайсса энергиялул физикалул аралуву дур­сса куртIсса ххал дигьавурттал. Яла оьрмулул чIивима аьлимчу Станислав Поплавскийн дур дурагу 28 шин. Ванал Курчатовлул инс­титутравасса цала коллегахъащал дуллай ивкIун ур дуниял ля­хъаврил хIакъиравусса ххал дигьавур­тту. Станислав Поплавскийл цалла дурсса ахттаршиннарду жучIанна чIалну дияврил хIакъираву увкунни: «Электромагнитный индукциялул закон тIиртIуну махъ жучIанна электричество дуркIссар 100 шинава, мунийн бувну вай жу дур­сса ахттаршиннардугу жучIанна диян тамансса хIал хьун бю­хъайссар», — куну.
На хъинну ххари хьура вай жагьилтурал дурсса агьамшиву ду­сса ахттаршиннардая. Ххари хьура жула элмулул бучIантIимур лавай бувансса бюхъу-даража бусса жагьилтал бушиврия.
ХIадур бувссар
И. Саидовал