Февральданул 7-нний ДР-лул ХIукуматрал къатраву хьунни «Мюнпатсса паччахIлугърал управление» тIисса ДР-лул приоритетсса программалул проектрал комитетрал цалчинсса батIаву. БатIаву дачин дурну ия республикалул министртурал кабинетрал председательнал цалчинма хъиривчу Рамазан Аьлиев.
Ганал увкумунийн бувну, проектрал комитетравун бухлахиссар республикалул исполнительный властрал циняв органнал вакилтал, ДР-лул БакIчиначIасса Приоритетсса проектирдал советрал члентал, жяматийсса организациярдал ва элмулул сообществалул члентал.
«2016 шинал федерал хIукумат дуркIссар проектрал управлениялийн. Дагъусттаннан му цIусса давуну къахъанахъиссар, цанчирча жу ччянива (4 шинал хьхьичIва) зий байбивхьуну бивкIссару проектрал управлениялийну. Вай шиннардий проектрал управлениялул мюнпатшиву цила чIалачIи дунни», — увкунни вице-премьернал. «Мюнпатсса паччахIлугърал управление» тIисса приоритетсса проектрая ихтилат буллай, ганал бувсунни га ППР-данул (приоритный проект развития) ца къярттану хъанай душиву МФЦ-рдал сеть сакин даву. «Жулва МФЦ-лул даврин бивщуссар Щалвагу Аьрасатнал даражалийсса кьимат. ХIакьинусса кьини паччахIлугърал ва муниципал хIаллихшинну дуллай бур 98% агьалинан. 2015 шинал Дагъусттаннал МФЦ-лул дурну диркIссар сайки 470 азарда хIаллихшинна, 2016 шинал хIасиллайн бувну – сайки 2 миллион шавайсса.
ХIакьину жунма аьркинссар хьхьичIуннай дуллан электрон журалийсса хIаллихшинну», — увкунни Аьлиевлул.
Муния махъ батIаврий гьуртту хьуминнал ххал диргьунни «Мюнпатсса паччахIлугърал управление» тIисса цIанилу бувкIсса паспортирттал ва предложениярттал проектру.
