Шикку гьуртту хьунни виваллил иширттал министрнал хъиривчу, полициялул хъунама Сергей Карпов, Миграциялул управлениялул хъунама МахIаммад МахIаммадов, МВД-лул подразделениярттал каялувчитал.

Хьунабакьаврил мурад бия жула республикалийн зун, арцу лякъин бувкIсса кьатIаллил билаятирттал инсантурал масъалартту цачIу щябивкIун ххал бигьаву ва ми щаллу бансса чаранну лякъаву. ХIакьинусса кьини 10 азаруннийн бивсса кьатIаллил билаятирттал инсантал бур Дагъусттаннай зий.
— КьатIаллил билаятирттая жучIанма инсантал нанисса ми шикку тIалавну буну тIийри. Ми цукунчIавсса криминалдануцIун бавхIусса, жува азурда буллалисса инсантал бакъар. Бигьасса оьрмулул хъирив бакъарча, чара ба­къашиврулли инсан цала къатта-къушгу, кулпатгу кьабивтун, даврих луглай, цамур билаятрайн учIайсса. Сириянал, Ираннал, УзбакIнал, Таджикнал ва цаймигу билаятирттал агьлугу мукунни Дагъусттаннайн бувкIсса. Ми инсантуращал нахIу-хIалимсса ихтилат бикIан аьркин­ссар. Закондалул ххуттава къабук­лакисса мигрантътуран дахшишру дуллай, азурда буллан къабучIиссар. Хьунабакьлай бур, цал полициялий кIулсса буссар тIий, цала ватанлувтал биттун, хъяврин бан кьаст лахIлахIисса, бучIи бакъасса инсантал. Агана цайми билаятир­ттая бувкIсса инсантал закондалийн мютIину бухьурча, минначIа аьркинсса документру бухьурча, миннан бахчу буллалисса кIанттурду цукунчIав бикIан къабучIиссар. Амма хъанай бур ишру Дагъус­ттаннайн нанисса кьатIаллил билаятирттал инсантураща органнал зузалтрал документругу зевххуну, шаппай тIайла буклакисса. Мукун­сса ишру закондалул ххуттава къабувксса гастарбайтертуращалгума хьуну бур, — бувсунни Аьвдурашид МахIаммадовлул.
Министрнал бувсунни 18 шинай цува УзбакIнаву ялапар хъанай ивкIшиву ва тачIав цанма чил кIанай ушиву асар къавхьушиву, та билаят цанма кIилчинмур Ватанну хьушиву.
— Жула республикалийгу цала Ватандалия архсса инсантуран мукунма рахIатну, бигьану ччива ттун, — увкунни министрнал.
Министрнал бусласимунийн бувну, кьатIаллил билаятирттая Дагъусттаннайн бувкIсса инсантурал дулун аьркинссар оьрус мазрал ва Аьрасатнал тарихрал экзамен. МинначIа дикIан аьркинссар прописка ва зунсса ихтияр. Ми ихтиярду ласуншиврул миннал патент ласун аьркинну бур. Му ласун кIанай, мигрантътурал щаллу буллай бур хIарамсса документру. Мигу тава-тагу ашкара хъанай бур. ХIарамсса санитарный луттирдащал дукра дуллалисса кIанттурдай зузисса гастарбайтертурая инсантурал цIуллу-сагъшиврун нигьачIаву дур.
Ларгсса шинал 8 азаруннийн бивсса ишру хьуну бур миграциялул законодательствалул ххуттава бувксса, 50 азара мигрантнахьхьун чIумуй документ къабуллусса. Диаспорардал вакилтал бур кIантту-кIанттурдайсса виваллил иширттал отделлал хъуниминначIан багьан хъинну захIматну бур тIий. Аьвдурашид МахIаммадовлул цIунилгу кьянкьану баян бунни, миграциялул, полициялул службалуву зузиминнал, цала бияла ишла бувну, кьатIаллил инсантал цIиклан цукунчIав къабучIиссар куну, мукунсса ишру кIул хьурча, зузалт жавабрайн буцинтIишиву, хIатта къуллугъраягума букьан бантIишиву. Хъирив цивппа хьунабакьлакьи­сса масъаларттаягу бувсун, ми бигьану щаллу буллансса маслихIатру бунни диаспорардал вакилтурал. Республикалийсса азирбижаннал миллатрал ва культуралул автономиялул каялувчи Ракиф Аьзизовлул бувсунни ларгсса шинал цачIанма цала инсантурал ихтиярду ссуссукьу даврил хIакъиравусса азарунния ливчусса аьрзри бувкIшиву. Багьана бакъана полициялул отделлайн буцлай бушиву кьатIату бувкIми. ЧIявуну полициялул райотделлай мигрантътурал документру бакъа хъанай бушиву ягу ми зурдардий полициялул отделлай бувгьуну бушиву. Бакъа хьусса документру цIу буккан бан бигьану бакъашиву. Ракиф Аьзизовлул мукунма бувсунни МахIачкъалаллал Советский райондалул полициялул отделданул хъунаманащал хьунаакьин къа­хъанай цала кIива барз хьушиву. Министр­нал дюъ дирхьунни цала зузалт­рай, ххишала укун аьрзирай­сса инсантал бикIан къабучIиссар, Азирбижаннал агьлугу азурда мабулларди куну.
ГИБДД-лул участковыйтурал хъуниминнан, ППСП-полкирдал командиртуран баян бунни кьатIату бувкIсса инсантал къак-щук буллалисса кIанттурду къахьун ялув бацIияра куну. Министрнал бувсунни кьатIату бувкIмигу жаваб­райн буцинтIишиву, агана ми миг­рантътурал хIакъиравусса закондалул тIалавшиннарду дуручлай бакъахьурча.
Аьркинсса документру щаллу буллай, мигрантътуран личIи-личIисса инстанциярдайн занай, миккугу хъунмасса хIаллай ялугьлан багьлай бур тIисса диаспорардал вакилтуран жаваб дуллай, Аьвдурашид МахIаммадовлул бувсунни шагьрулий цинявппа масъалартту ца кIанай щаллу бансса миграциялул отдел тIитIинсса пикри бушиву.
— Жула республикалийн кьатIату бувкIсса инсантуран къулайсса шартIру даву ва миннал мюхчаншиву дуруччаву – му жул буржри, мигу жула хIукуматрал агьлур, — увкунни министрнал.