Февральданул 20-нний МахIачкъалалив Р. ХIамзатовлул цIанийсса Миллатрал библиотекалуву хьунни «Роль русского языка и языков народов Дагестана в формировании национальной и общероссийской идентичности» цIанилусса республикалул элмийсса ва практикалул конференция. Му хас бувну февральданул 21-нний кIицI лагайсса Ниттил мазурдил кьинилун ва хьунни оьруснал культуралул республикалул «Масленица» байрандалул лагрулий.
Бадрижамал Аьлиева
Конференциялул давривух гьуртту хьунни республикалул шагьрурдаясса ва районнаясса культуралул зузалт, аьлимтал, республикалул вузирдал ва школардал дарсдихьулт, халкьуннал коллективирттал каялувчитал. Бия республикалул дазул кьатIатусса хъамалгу.
БатIаву дачин дурну бия ДР-лул культуралул министрнал хъиривчу, Республикалул Халкьуннал творчествалул къатлул директор МухIадова Марита. Ванил ДР-лул культуралул министр Зарема Буттаевал цIания бавтIминнахь ча бувкру тIисса махъ лавхъунни, барчаллагь увкунни миллатирттал мазру ва культурарду дуручлай захIмат буллалиминнахь. Цилва ихтилатраву Марита Велихановнал кIицI лавгунни халкьуннал культура, аьдат_ру хьхьичIуннай давриву гьарцаннал буллалисса захIматрал хъуннасса агьамшиву душиву, кIицI лавгунни ва конференциялул агьаммур мурад бушиву оьрус мазрахсса ччаврийхчIин ва хIурматрайхчIин махъа нанисса никираву, цурдагу цIанасса бигьа бакъасса заманнай хъунна хъанахъисса, инсаннал хасиятрал язими лишанну тарбия даву.
Хъирив ихтилат бунни РАН ДНЦ-лул директор МахIаммадов МахIаммадлул. Мунал ихтилат бия оьрус мазрал хьхьичI хIакьину бавцIусса масъаларттая, хаснурив чил мазурдивасса мукъурттия оьрус маз марцI буван аьркиншивриясса, Дагъусттаннал агьалинал
90 % оьрус мазрай гъалгъа тIутIисса бунугу, мазрал цила даражамур махъсса ацIрахъул шиннардий ялавай багьшивриясса.
— Февральданул 21-нний кIицI лагай Ниттил мазурдил кьини. Хъинну чIявусса инсантуран оьрус маз хъанахъиссар ниттил мазну. Амма вайксса чIявусса инсантал гъалгъа тIутIисса мазрайнгума цайми мазурдил къаххуйсса асар биян буллай бур, хаснува ингилис мазрал. Оьрус маз ингилис мазрая биллалисса салахI бакъасса асардая мурахас буван аьркинни. Оьрус маз, чапа тIий, бувцIуну бур ингилис мукъурттил, ингилис мазрайсса балайрдал дазу-зума дакъасса конкурсирдая гъалгъавагу къатIий. Цавагу чил билаятрай ккаккан дувара, духьурча, оьрус мазрайсса балайрдал конкурс. Дакъассар.
Буруччин аьркинссар ниттил мазру, ниттил мазрахсса ччаврил ва хIурматрал гьанурив кулпатравур бизайсса, – увкунни МахIаммад Ибрагьимовичлул.
Республикалул оьрус мазрал ва культуралул центрданул директор Лариса Кукановал бувсунни мазрал марцIшиву ва аваданшиву дуруччаву мурадрай цалла щаллу дуллалисса проектирдая ва акциярттая. Бувсунни Центрданул сипталийну тIиртIуну душиву консультациялул линия «Грамотей», миккун ччимур чIумал ччимур мукъул хIакъираву оьвчин бюхъайшиву агьалинаща ва оьвтIийгу бикIайшиву, хIатта цайми республикалиясса инсанталгума, бувсунни мукунма цала итабавкьушиву чичаву ва чIурчIав даву захIмат хъанахъисса махъру цачIун бувсса календарь.
Жулла республикалийн, Ккавкказнавун хьхьичIа-хьхьичI хъамалу увкIсса Аьрасатнал Художниктурал союзрал член, Русский географический обществалул член Сергей Глебушкиннул доклад бия халкьуннал костюмирттан хас бувсса. Сайки 30 шинай халкьуннал янна-калуха, миннул тарихраха зузисса художникнал бусанмургу чансса бакъая. Ванал коллекциялуву дусса дия личIи-личIисса халкьуннал костюмру, хIатта 100-150 шин хьуссагума. Бувсунни ва коллекция ккаккан бувантIишиву хъиривмур кьини Оьруснал театрдануву хьунтIисса «Масленица» байрандалий.
МахIачкъала шагьрулул 18-мур школалул завуч, оьрус мазрал ва литературалул учительница Маммаева Тамарал (Читтурдал шяравасса) ихтилат бия цайми культурардачIан оьрус мазрахсса ччаврийхчIин ва хIурматрайхчIин ххуллурду ласавриясса, мазрахсса ччаврил гьанугу, цайми мазурдий гъалгъа тIисса, цайми культурарду дусса инсантурах ссавурданий бургаврил, яни толерантностьрал, гьанугу школалий бизайшивриясса.
Ихтилатру мукунма бунни ДГПУ-лул оьрус мазрал дарс миллатрал школалий дишаврил кафедралул доцент, филологиялул элмурдал кандидат Терехова Неллил, искусствовед, РДНТ-лул пишакар МахIаммадова-Чалабова Марияннул, профессор Ханжов Юрийл, Оьрус мазрал миллатрал масъалартталсса байсса ДР-лул ХIукуматрал комиссиялул жаваблувсса секретарь Евсеева Натальял, ДГУ-рал дарсдихьу Оьмарова Шамалал, Лаващиял райондалийсса ЦIахъардал шяраваллил Аьрасатнал халкьуннал аслийсса культуралул центрданул директор Мутаева Загьидатлул ва чIявусса цайминналгу.
