Февральданул 20-нния тиннай дайдирхьунни гьашинумур Масленицалул нюжмар ва му лахъи лагантIиссар февральданул 26-ннийн дияннин. Мунин хасну, февральданул 21-нний МахIачкъалалив Оьруснал театрдануву хьунни Республикалул XIV байран «Масленица». Му сакин дурну дия шагьрулул Культуралул управлениялул, ДР-лул Культуралул министерствалущал цачIу.
Бадрижамал Аьлиева
Оьруснал театрданул хьхьичI­сса майданнив хьунни ххюлтIукурдал ярмукIа. Хьунни личIи-личIисса спортрал бяст-ччаллу. Шадлугъравух гьур­тту хьунни ДР-лул Халкьуннал Мажлисрал председатель Хизри Шихсяидовгу.
Хъирив Оьруснал театрданул хъунмур залдануву хьунни байрандалул хъуннасса концерт. Му дайдирхьунни вай гьантрай жулла республикалийн хъамалу увкIсса Аьрасатнал Художниктурал союзрал член, цикссагу шиннардий оьруснал халкьуннал костюмру датIлатIисса ва миннул тарих лахьлахьисса Сергей Глебушкиннул костюмирттал коллекция ккаккан баврия. Концертравух гьуртту хьунни «Лезгинка» ансамбль, ПаччахIлугърал опералул ва балетрал театрданул симфониялул оркестр ва халкьуннал инструментирттал оркестр, мукунна «Дагъусттаннал жагьилшиву» ансамбль ва «Джислам» балайлул театр, «Эридан» коллектив ва чIявусса цаймигу.