Вай гьантрай республикалул вузирдаву ва школардай Ниттил мазурдил кьинилун хасъсса батIавуртту, мажлисру ва тяхъашивуртту най дур.
З. АьбдурахIманова
Февральданул 21-нний ниттил мазурдил дарсирдал масъалартту ххал бигьлагьисса «Маз ва дагъусттаннал школарду» тIисса ирглийсса конференция хьунни МахIачкъалаллал 1-мур школа-гимназиялийгу. Ванил сакиншинна дурну дия Тахо-Годил цIанийсса Дагъусттаннал элмийсса хъиривлаявурттал институтрал. Шиккун бувкIун бия республикалул сайки циняв шагьрурдал ва районнал школардай ниттил мазрал дарсру дихьлахьисса учительтал. Мукунма шикку ххуйсса, учительтуран мюнпатсса ихтилатирттащал гьуртту хьунни ДГПУ-рал профессор Загьир Загьиров, Республикалул чIяру профиллу дусса лицейраву оьрус мазрал ва литературалул дарсру дихьлахьисса учитель ХIабибат ХIажимурадова, ларгсса шинал «Яла ххуйма ниттил мазрал учитель» тIисса цIанин лайкь хьусса, МахIачкъалаллал №53 школалий табасаран мазрал дарс дихьлахьисса Мадина Таибова ва цаймигу.
Конференция тIитIлай, ДНИИП-рал директор ХIамидуллагь МахIаммадовлул, циняв барчагу бувну, хIакьину школардай ниттил мазрал дарсру дишаврийн багьайсса цаппара масъаларттая аьмну бувсунни.
«Махъ ппурттуву республикалул кIулшивуртту дулаврил идарарттай ниттил мазурдил чулухунмайсса ургъилданул даража цукссагу къулай хьуссар. Ниттил мазурдил дарсирдай шиная шинайн уттизаманнул техникийсса бюхъурду, каширду ишла дуллай буссар. Бур ттигу жу щаллу бан дакIнийсса чIявусса буруккинтру, методикалул ва учебный литературалуцIун бавхIусса ва цаймигу масъалартту», — увкунни ванал. Бувсунни, мукунма, билаятрал личIи-личIисса миллатру яхъанахъисса регионнах бурувгун, жулламур республикалул школардай ниттил мазурдил дарсирдалмур тагьар ляличIисса душиву. Масалдаран, институтрал директорнал бусаврийн бувну, цIана вайннаща бюхълай бакъасса бур бищунсса луттирдал ялув зун. Цанчирча лу хIадур бувну махъ, Москавлив хасъсса къуллугърай мунил хIакъираву мукьва комиссия бан тIалав буллалисса хIукму бувккун тIий. Чачаннал, татарнал, ингушнал мазурдин ца-ца луттирдал мукунсса журалул комиссиярду бан бухьурча, чIявумиллатру бусса жучIава школардай 12 мазрал дарс дишайсса луттирдан бан багьлай бусса бур. Мигу чIярусса харжлугъ хъанахъиссар. ХI. МахIаммадовлул кIицI бувунни цIана цув, ва иширал хъирив увккун, масъала дузал бавриха зий ушиву.
Хъирив ХIабибат ХIажимурадовал ва Мадина Таибовалгу бувсунни хIакьину мазурдил ва литературалул дарсру дишайни хьунабакьайсса агьамми захIматшивурттая. Мадина Таибовал кIицI бунни дарс дишайни ишла бансса чIалачIи пособияртту ва цаймигу методикалул литература диял къахъанахъишиву, компьютерду ва цаймигу оборудование дуна, миннуйхчIин ишла дувансса материаллу чанну душиву ва цаймигу ишру.
ХIабибат ХIажимурадовал бувсунни оьрус мазрал ЕГЭ дулун хIадур байни цанна хьунадакьлакьисса захIматшивурттая.
Хъирив ДНИИП-рал пишакартурал учительтурал чулухасса суаллан гьарта-гьарзасса, балжисса жавабру дуллунни.
Конференциялул элмийсса бутIул хъирив циняв цала-цала мазурдил секциярдайх бавчIунни, гикку ххал бивгьунни цала-цалами мурадру. Лакку мазралмур секция бачин бувну бия ДНИИП-рал элмийсса хъуними зузалт Светлана Мутаева ва Пиразат Магьдиева. Шиккугу учительтурал цала дяниву ххал бивгьунни хъунмурчIин цанма дарсирдай, цала пишараву хьунабакьайсса буруккинну.
