ЦIанасса заманнай чIярур личIи-личIисса конкурсру ва цаймигу бяст-ччаллу, гьунар бусса оьрчIру, жагьилтал щалвагу билаятрал лагрулий ялун личин буллалисса. Ми хаснура дучIину лякъай ва миннувух гьуртту шаву хъуннассара сийну дикIай билаятрал хъун шагьрулия архну ялапар хъанахъими оьрчIан.Ца мукунсса, оьрчIансса, «Ты супер!» конкурсрал премьера хьунни НТВ каналданий февральданул 11-нний. Мунивух гьуртту хьунни Дагъусттаннаясса 15 шинавусса душ Карина Исмяиловагу.
[responsivevoice_button voice=»Russian Female» buttontext=»ВИЧIИ ДИХЬЛАН»] Карина Исмяилова тарбия хъанай бур МахIачкъалаллал шагьрулул 5-мур искусствалул школалий. НТВ каналданул «Ты супер!» телевизион шоулул цалчинсса этап лайкьну дурхIунни Каринал. Микку ванил ххаллилну щаллу бунни Алла Пугачевал балай «Нас бьют, мы летаем». ЦIанасса чIумал чIава балайчи уттигу Москавлив бур, конкурсрал хъиривмур этапрайн хIадур хъанай.
Карина Исмяилова уттинин цимилгу гьуртту хьуну бур жулла республикалий дуллалисса шадлугъирттавух, цимилгу хьуну бур личIи-личIисса конкурсирттал лауреат. Махъсса ппурттуву ларсми ххувшавурттавасса ца дур Республикалул БакIчи Рамазан АьбдуллатIиповлул бахшиширттайнсса «Дагъусттаннал пахру» конкурсравусса хьхьичIунсса кIану.
«Ты супер!» конкурсрал жюрилуву бур жула билаятрал шоу-бизнесрал яргсса цIуртти: Виктор Дробыш, Маргарита Суханкина, Ёлка, Стас Пьеха.
Ялугьланну Каринал цIу-цIусса ххувшавурттаясса хавардах.
