Февральданул 13-нний МахIачкъалаллал КIулшивуртту дулаврил управлениялий социал сетирдал оьрчIал психологиялийн биян буллалисса асардан хасъсса экстренныйсса батIаву хьунни.

З.АьбдурахIманова
Шикку ххал бивгьунни оьрчIал цанма цала бан гьуз учин буллалисса тIуркIурдаясса, социал сетирдавусса группардаясса масъала. БатIаврил сакиншинначитурал бувсунни мукун нигьачIишиву рутлатисса тIуркIурду цагу-кIивагу бакъашиву. Ми бусса бур «Тихий дом», «Синий кит», «f57» тIисса ва цаймигу. Ми цIубакIрай бусса бур личIи-личIисса мурадру бартбигьин оьвтIисса, яла тIурча — жагьилтуран ххира хьусса квэстрал журалийсса. ТIуркIурдал администратортурал, цаннияр ца аьжаив­сса заданияртту дуллай иян айсса ур махъра-махъсса этапрайн –цанма цала бан гьуз учин уллалисса журалийн.
Шагьрулул КIулшивуртту дулаврил управлениялул хъунама ТIагьир Мансуровлул батIаврий бувсунни, шагьрулул циняв школардай най душиву профилактикалул давуртту ва оьрчIал хъирив бавцIуну бушиву.
«БатIира нитти-буттахъул, дувара миннащалсса батIавуртту, классрал ссятру. Буцара дарсирдайн психологтал, социал педагогтал. Гьар кьини ххал дувара оьрчIал кару — микку чIиллух дурсса аьшру дурив ххал дан. Циняв школардай дирхьуну дуссар оьрчIру социал сетирдавун буххан къабитансса фильтырду»,-увкунни ванал.
БатIаврий мукунма гьаз бувунни оьрчIан планшетру, смартфонну ишла даврин къадагъа дишин аьркинссар тIисса ихтилатругу.
Мукунма цаппараннал ххи бувунни, шаппа ягу школардай мукунсса къадагъа диширчагума, шагьрулуву чансса бакъашиву компьютерданул клубру. Мивугу оьрчIру ургала акъа, цанна ччи-ччимуний тIуркIу тIий бикIайшиву.
ДР-лийсса АьФ-лул ФСБ-лул вакилнал кIицI бувунни компьютерданул тIуркIурдал аваза ваниннингу бивкIшиву ва миннуя цичIав мюнпатсса жула оьрчIан ттинингу къабивкIшиву. Мукунма кIицI бувунни хъунмурчIин мукунсса тIуркIурдал сипттачитал, серверду билаятрал кьатIув, чил паччахIлугъирттай бикIайшиву. Минналгу гужсса шифрду ди­кIайшиву.
Ихтилатру мукунма шикку бувунни: хъуншагьрулул Хъаннил советрал хъунмур Зайнаб Ибрагьимовал, ДР-лул муфтийнал хъиривчу Идрис Асадуллаевлул ва цайминнал.
МахIачкъалаллал 10-сса школалул директор Рамиз Сердеровлул бувсунни цал школалий кIира шинал хьхьичIва къадагъа дирхьуну душиву оьрчIан интернетравун буххан шайсса телефоннащал занан. Бувсунни цIубакIрай хъинну захIмат хьушиву му иширащал талан, цIанарив цал му иширал ялув бакIцIуцIаву дакъашиву.
Балугъравун къабувхсса оьр­чIал ялув бавцIусса къуллугъир­ттал вакилтурал тавакъю бувунни батIаврийн бувкIминнахь, оьрчIал чурххай ххарссив ягу цайми цIунцIияртту, аьшру ххал хьурчан, мугьлат бакъа цайн баян бан.