Февральданул 7-нний бувксса ДР-лул БакIчи Рамазан АьбдуллатIиповлул ХIукмулийну ДР-лул печатьрал ва информациялул министрну ивтунни Рашид Акавов. Вара кьини цамур ХIукмулийну вава идаралул бакIчинал къуллугърая мурахас бунни Бурлият Токболатова.
ХIасан Аьдилов
Журналистътуращал министерствалул цIусса каялувчи кIул уван бувкIунни Дагъусттан Республикалул ХIукуматрал Председательнал 1-ма хъиривчу Анатолий Карибов, ДР-лул БакIчинал ва ХIукуматрал Администрациялул Информациялул политикалул управлениялул хъунама Зубайру Зубайруев ва Республикалул хъунаманал советник Азнаур Аджиев.
Анатолий Карибовлул лавайсса кьимат бивщунни министрну бивкIсса Бурлият Токболатовал даврин. Министерствалул цIусса каялувчи ккаккан уллай. Ванал увкунни: Рашид Забитович чIявучин кIулсса инсанни. Ванал къуртал бувссар ДГУ-лул филологиялул факультет, яла хьуссар элмурдал доктор. Зий ивкIссар ДГПУ-рал музыкалул факультетрал деканну. Хъин чулий ккаклакиссару Рашид Акавов культура ара ххуйну кIулсса инсан ушивугу».
Рашид Акавовлул барчаллагь увкунни цайнна вихшала дишаврихлу ва бувсунни цащава бюхъаймур бан тIий ушиву му вихшала хIалал дуван.
Министерствалул хьхьичIмур каялувчи Бурлият Токболатовал даврил уртакьтурахь барчаллагь увкунни цачIу зузаврихлу ва журналистътурахь тавакъю бунни, цачIун хьуну, хьхьичIунмайгу лябукку буну зун.
