Февральданул 10-нний МахIачкъалаллал администрациялий Муса Мусаев хьунаавкьунни ДР-лул БакIчинал ва ХIукуматрал администрациялул Управлениялул хъунаманал хъиривчу Марина Степаненкощал. Ванил каялувшиндаралу дуссар проектру щурущаврил тагьар ва миннул экспертиза. БатIаврий мукунма гьуртту хьунни хъуншагьрулул бакIчинал хъиривчутал ва личIи-личIисса къуллугъирттал вакилтал.

З. АьбдурахIманова
БатIаврий М. Мусаевлул чIурчIав дурунни уттиния гихунмай хIукуматрал къуллугъру, хаснува ванал хъиривчутал, зун аьркиншиврий «проектный офис» тIисса форматрал лагрулий. Мукунма кIицI лавгунни мукунсса журалий зий бушиву республикалул ХIукуматрал ва цаймигу ведомстварттал зузалт ва цан миннал давриву цIанара ххуйсса ккаккияртту хIисав хъанай душиву.
Хъирив Марина Степаненколгу бувсунни, проектрал каялувшиндаралул журалийн кIура баярча, бигьашиву хьунтIишиву нанисса давурттал ялув бацIан ва миннул тагьарданул анализ дуван. Ва журалийн бучIарча, ишла буллан бюхъантIиссар сетевой пландалул графикру, цивунгу шагьрулул районнал ва мэриялул каялувшиндаралусса идарарттал дан аьркинсса давуртту ларсъсса. Проектрайн бувну, бюхъантIиссар ми давуртту ци даражалийн дирну дуссарив кIул дуллан. Ттинин бакIчинал буллай ивкIсса амрурдал ялув бацIан бюхъантIиссар му проектрал каялувшиндарайхчIин.