КIуллагу дакъа ларгунни 10 шин цIанихсса аьлимчу, Аллагьнала хIисаврттал ва физикалул элмулул учительну ляхъан увсса Кьурбан АхIмадов жуятува личIий хьуну.

Кьурбан увну ур 1943 шинал ГьунчIукьатIатусса арцул усттар АхIмадов ХIамидлул кулпатраву. 1961 шинал мусил медальданий къуртал бувну бур ГьунчIукьатIрал школа, 1968 шинал ЯтIул дипломрай къуртал бувну бур Москавуллал инженерно-физический институт. Кьурбаннун оьрчIан зат лахьхьин баврихсса гъира Аллагьнаяту най бухьунссия, инс­титутраву дук­лай унува Кьурбан Москавуллал № 9 школалий физикалул дарс дишайсса учительну зий ивкIссар. 1968 шинал увххун ур СССР-данул Физикалул элмурдал академиялучIасса институт­рал аспирантуралувун. Дурур­ччуну диссертация, ларсун дур физикалул ва хIисаврттал элмулул кандидатнал цIа. Яла чIярусса шиннардий дарс дихьлай ивкIун ур Таджикисттаннай. 1985 шинал ванан дуллуну дур «Таджикнал ССР-данул просвещениялул отличникнал» цIа. Яла дуллуну дур «СССР-данул просвещениялул отличникнал» цIа. Буттал кIанттайн, Дагъусттаннайн зана хьуну махъ, 1992 шиная шихунай, МахIачкъалаллал школардай физикалул ва хIисаврттал дарс дишайсса учительну зий ­уссия. 1995 шиная шихунай, дунияллия гьаннин – дарсру дишайссия Дагъус­ттан Республикалул чIярусса профиллу дусса лицейраву.
Ва ия ххишала акъа лавай­сса даражалул пишакар. Ванан цалла элму кIула щиннияргу ххуйну. Ванал хIадур був­сса оьрчIру бу­ххайва Москавуллал цIанихми инс­титутирттавун. Ва лайкь хьуну ия «Дагъусттан Республикалул лайкь хьусса учитель» цIанин, Аьра­сатнал Федерациялул Президентнал грантран (премия). 2006 шинал Кьурбаннул Аьрасатнал физикалул дарс дишай­сса учительтурал бяст-ччалливу цалчинсса кIану бувгьуссар.
Ванал сакин бувну бия «500 эвристических задач» тIисса лу. Му лу Кьурбан ивкIуну ца шин хьусса чIумал ва зий ивкIсса лицейрал директорнал дунияллийн буккан бунни.
КIуллагу дакъа Кьурбан акъа ларгунни 10 шин. Амма дус­турачIа Кьурбаннул цIа уттарана дуссар.
ГьунчIукьатIрал ккуран