Февральданул 1-нний Россельхознадзорданул Дагъусттаннай­сса Управлениялий 2016 шинал республикалул СМИ-рдал журналистътурахь цала дурсса давурттал хIасиллая бусласисса пресс-конференция хьунни.

Залму АьбдурахIманова
Му тIитIлай, уттигъанну Управлениялул каялувчину ивт­сса Кьурбан Рамазановлул бувсунни цал пишакартурал ларгсса шинал 2417 рейд дуршиву ва 1196 низамлияву сияхIрайн ларсшиву. Низам лиян дурминнал хIакъираву аьмну 3, 2 миллиондалунсса аькIри чирчуну дур.
Республикалул хасъсса полигоннай управлениялул пишакартурал ккуччу дурну, бат дурну дур санкцияртту дирхьусса дуки-хIачIиялул 5 тонна. Миннувух чIяруми дур Польшанавасса, Турциянавасса, Испаниянавасса ахъулсса. Кьурбан Рамазановлул мукунма бувсунни чIяруми низамлиявурттугу хъунмурчIин ветеринариялущал дархIусса душиву.
«ХIакьинусса кьинигу рес­публикалий хьхьара хьуну да­къар ризкьи лахъай азардал къашай хъанахъисса тагьар. Хаснува бруцеллезрал ва нодулярсса дерматитрал азардалмур тагьар. Чансса къулай хьуну дур африканал чума тIисса азардануцIун дархIумур тагьар.
Ларгсса шинал жул пишакартурал, къалпсса дурив, дакъарив ххал дан, 140 проба лавсун бур накIлил ва 25 проба дикIулми продукциярдая. Миннува аьмну 30 проба лявкъуссар ххяххиялул аьгъушиву ва ветеринариялул даруртту хIаласса къалпсса продукциярдал. Халкьуннал ишла дайсса дуки-хIачIиялуву ми гьич дикIан къабучIиссар. Вай давуртту сававнугу жу республикалий дикIуха, накIлиха зузисса предприятиярттай 12 пландалий дакъасса ялтту буккавуртту, ххал бигьавуртту дурссар», — бувсунни Управлениялул каялувчинал.
Мукунма ванал кIицI бувунни, фитосанитариялул хъиривлаявурттайн бувну, цал пишакартурал карантин дирхьусса, халкьуннал цIуллу-сагъшиврун заралсса ххяххиярттал 7 жура ялун личин бувшиву. ЧIяруну вайннан ххяххирттай лякъайсса дур повилика тIисса, хъинну нигьачIисса азар.
Республикалийсса фитосанитариялул тагьардания гьарта-гьарзану журналистътурахь бувсунни Управлениялул каялувчинал хъиривчу Заур Къарачаевлулгу. Ванал бусаврийну, жулла республикалийн 10 хIукуматрая дучIайсса дур даххансса ахъулсса, ахънилсри, хъунмурчIин Ираннава ва Азирбижаннава.
«Дагъусттаннайсса дазуй жул управлениялул пишакартурал карантин дирхьусса тагьарданул лагрулий 31 азарда транспорт ххал дурну дур. МахIачкъалаллал хьхьирил портрайсса къалмул терминалданийхчIин Ираннал Республикалийн жула шичча тIайла дурккун дур 333 азарда тонна къалмул продукциялул. ТайнначIату нанисса 1,2 тонна жул пишакартуран ляркъуну дур карантин дирхьусса. Ши­ккува кIицI бан ччива жу, жула билаятрайн даххан ларсун нанисса хъуслинсса чагъарду ххал баврицIун, цурда хъусгу ххал дайшиву ва миннул проба ласайшиву. Ми пробарду Дагъус­ттаннал элмийсса хъиривлаявур­тту дайсса институтрал ххал бувну махъ дулайссар ихтияр жула дазу лахъан», — бувсунни З. Къарачаевлул.
Республикалул аьрщирду цукунсса даражалий дуссарив ва цукун ишла дуллай буссарив бусласисса ихтилат бувунни идаралул каялувчинал хъиривчу Карим Каримовлул. Ванал бусаврийну, махъсса кIира-шанна шинал мутталий гьарза хьуну ду­сса дур аьрщирду ишла дуллалаву, зузи дуллалаву ва миннуя мюнпат ласласаву. Мукунна ванал чIурчIав дурунни республикалий ца яла чIявуми суаллу ва захIматшивуртту хьунадакьайшиву хаснува ва аьрщарацIун дархIумур аралуву.
«Хъурурду, дугьай аьрщив жула багьа бакъасса ххазинар. Аьмну мукунсса аьрщирдал 20-30 % бур дукъагьлай, оьнна кьариртсса. Жухь ихтияр дур ми аьрщирдал заллухъруннай 700 азаруннийн дирсса аькIри дишин. Амма, жула СПК-рдал укуннагу лащинсса тагьарду душиву хIисавравун лавсун, жуща бюхълай бакъар ми дихьлан. Жу цимилагу тавакъю барду муниципалитетирттал каялувчитурахь, аьрщирду зузи дансса, миннуя мюнпат бучIан буллансса чаранну лякъира куну, Бувар ттигу миннан жу тIимур бувчIин», — увкунни ванал.
Мукунма К. Каримовлул бувсунни ризкьи ябуллалисса лух­ччал тагьарданиягу. КIицI лавгунни ризкьи кIинтнил минардая гъинтнил минардайн куч къабулалаврилгу хъунмасса зараллу биян буллай бушиву республикалул лухччайн.
Пресс-конференциялул ахирданийгу управлениялул пишакартурал журналистътурал суаллахьхьун балжисса жавабру дуллунни.