[responsivevoice_button voice=»Russian Female» buttontext=»ВИЧIИ ДИХЬЛАН»]  • Москавливсса бусурман агьулданул Сириянавасса ли­хъачалтран кумагран 6 миллион арцул бавтIун бур. Москавуллал муфтий Илдар- хIазрат Аляуттиновлул баян бунни вай гьант­рай ми 6 миллион Ливаннайн биянтIишиву.

• Африканал Зимбабве паччахIлугърал хъунаманал, 93 шинал оьрмулувусса Роберт Мугабел, баян бунни цува 2019 шинал, билаятрал хъунама увчIлачIийни, цала кандидатурагу дишин ччай ушиву. Ва 35 шинал мутталий Зимбабвелий каялувшиву дуллай ур. Билаятмур мискинну, лащин­сса тагьарданий бур. Амма Мугабе дакI дарцIуну усса ур билаятрал паччахIшиву дувансса, цала кIану бугьан лайкьсса цама акъашиврий.

• Латвиянал паччахIлугърал мазрал центрданул баян бунни Рига шагьрулул мэр Нил Ушаковлуй оьрус мазрай ихтилат баврихлу аьчIа дишинтIишиву. Дуклаки оьрчIащалсса хьунабакьаврий Ушаковлул оьрус мазрай ихтилат бувну бур.

• Белоруссиянал цаппара шагьрурдай агьали, зун къаччишиврухлусса (тунеядство) налог дукьан дувара тIий, митингирттайн бувккун бур. Давур­ттив дакъанура, укунсса налограл тIалавшинна дуллалаврия тайннал агьали рязи бакъа бур.

• Къиргъизнаву парламент­рал депутат Газабек Икрамовлул маслихIат бувну бур нюжмар кьини, ахттайн чаклил чIумал, перерыв дувансса ихтияр дулун агьалинахьхьун.

• Пакисттаннай Исламабадрал Лаваймур судрал Мубараксса Валентиннул Кьини (февраль зурул 14-нний дувайсса эшкьи-ччаврил байран хIисаврай) кIицI лаглагаврий къадагъа дирхьуну дур, ва бусурманнал тIул-тIабиаьтрацIун къадаркьусса байран дур тIий.

• Саоьдуллал Аьрабус­ттаннал Американал хъирив баян бунни терроризмалул спонсоршиву дуллалисса билаят Иран бушиву. Аьрабнал паччахIлугърал МИД-рал хъунама Адел Ал-Жубайрдул баян бунни ИГИЛ-данул терактру къадурсса билаят анжагъ ца Иранналсса бушиву.
ХIадур бувссар
П. Рамазановал