Ларгсса цIушинал байрандалия ххари хьунсса муттавагу къабуллуну тIиссакссагу, дукIу вава ппурттуву жул, 1-мур ЦIувкIуллал, ва Гъумучиял жяматрал дакIру къума-банд лаган дувансса оьзру хьуссия: Москавлив январь зурул 14-нний авария хьуну дунияллия лавгуна Жамаллул ва Тамарал арс Артур Жамалов.

Оьрмулул 26 шинавусса жагьил. Дагъусттаннал политехнический университет къуртал бувну дахьва диплом лавсъсса, щар дуцинагу увасса, оьвхъусса, дуккавривугу, давривугу, спортравугу итххявхсса жагьил. Жамал ва Тамара ЦIувкIратуссар,ччянива Гъумук мина дирхьуну, кIанттулгу хьуну, захIмат ххирашиврийну агьалинан бусрав хьусса лас ва щарди.Тамара жущал архIал ца классраву дуклай буссия. ЦIуллу- сагъшиврул цахъи хьхьарасса Тамарал дуллу дунияллий яла хъунмур ххазина бия ца акъа-акъасса арс Артур. Арсругу личIи-личIисса бикIайхха, тIайла авцIусса, хIарачат бусса, дуваймуниву мудангу хьхьичIунсса, нитти-буттах ва гъан-маччанах аякьалийсса арсная Тамаран пахругу бухьунссия, хьул-умудругу хъунисса бухьунссия. Ттунгу, архIал дуклакиминнангу оьр­мулухун хъамакъаританссар дукIусса январь зурул 16-мур кьини, жува Гъумукун жижара буван нанисса кьини. Куннан кув ххирасса, цачIун биярча бакъавцIуну хавардай жянгъа бишайсса жува му кьини кьабагьну нанисса куц. Маршруткалувусса пахъдагьру. КьурчIину къумпI-къумпIгу бивкIун щябивкIун нанисса жул гьарнал дакIнивугу бия бикIанмагу ца буруккин: ча ляхълантIиссару утти ца акъа-акъасса арснацIа хьусса Тамарахь учинсса, мунил дакI хьунмур бувансса махъру? Циру мунихь тIунтIисса? Къуркъа­сса къювулул бас бувсса мунил хьхьичI ци тIийру бацIантIисса? БурцIингу цIими хьунсса кьини дурккун дия жул Тамарайх. Инсаннан къаччан бикIан буван, чIу лахъ буван къакIулсса Тамарайх. Школалийн наниминнал кьюкьлувугу мудан хьхьичIва-хьхьичI бикIайссия. Къурув мухIру кIунттихьминнавугу диримуръя. Школалий уборщицану зузисса ниттин кумагран классру бахьлай, поллу шюшлай, жущал сайрданий буккан­сса мажалвагу мунил бакъассия. Ххишалдаран ппу фронтовикгу мурчIи хьуну уну, муналссагу буллан бикIайва, буттахь лу­ттирду ккалансса чIунгу лякъайва ичIаллил кушугу бувну. Тамара ттул чIаххурай бия, цачIу хъуни хьуссару, архIал кьуллалийн, лухччайн, къурув, зунттайн хьуссару. На мудангу мунил дакI хъиншиврий хIайран хъанай бу­ссияв. Ччувччунни жул Тамарал къатта! Леркьунни дуниял! Ца зумату кунма ссукIурай бия Артур кунмасса жагьилтал хъинну чанссар ва дунияллий, гьарца чулуха итххявхсса, чIануйн агьсса оьрчI уссия тIий. ХIат-хIисав дакъа чIявуя му ахиратравун тIайла уккан бавтIцири. ЧIявуя Тамарал ва Жамаллул щавуй ка дишин бавтIцири. Жун кIулли шин, жунна лерххун кунна гьарчагу, Тамаран му цуксса лахъину ва захIматну ларгссарив. КIулли жулва Тамара, инжит хъанай, азарханардайн багьлай бунугу, яхI буллай, кьянкьа дуллай бушиву. ДукIува учин къавхьусса махъру утти тIий, ягу дукIувагу увкумур тикрал буллай, жу Тамарахь миннат буллай буру, вила къювулучIа жулмур къювугу диша, вила дардирачIа жулмур дардгу диша тIий. Ххуйминнан къаххуйсса ва дунияллий жу мудангу вил чIарав буссару, ссувай Тамарай! Жу мудангу, цачIун бавтIний, цачIу-чIарав хьуний, чара бакъа вил Артурдух аьпа учару, вихьхьун ссавур дула тIий, Заннахь лергъа тIун бикIару.ЯхI къабувну чарагу ба­къахьувкун, яхI буллан багьантIиссар вингу. ЯхI буллан багьсса нитти­хъавух. Цуксса захIматнугу. Ххишала яхI бан къахьунсса кунмасса хIалданийн багьнийгу. Миннат буллай буру Аллагьу Тааьланайн лабизлай, вин цIуллушиву чIа тIий дуаьрдай. Вил ххира Артургу алжаннул ххари уваннав, гьаттай нур дизаннав тIий. Дуаь дуваврияр ххишала жуща бан шай­сса цамур цичIав бакъар. Зумувсса мазгу къухъна бацIлай буру, учин ччисса махъругу ххиллай, лихълай, ляхълай ба­къару. Ияча, ссувай, вил арс бюрни куна оьвхъусса, битавсса, бурандалул ччяни бутай бюхттул мурхь кунасса. Ва дунияллий мукунми лахъи къалагай, цуксса кьурчIинугу. Вил оьрмулувун дагьсса паранну, валлагьий, биллагьий, жулминнувунгу дагьунни оьрмулухун. ДакIругу пасат хьунни, ххаришивурттайхгу мя­ххи даркьунни. ЯхI буллалу, ссувай, халкьуннал балайлуву тIийкун, дунияллул яхIиранмагу!
АрхIал дуклай
бивкIцириннал цIанияту
ПатIимат Рамазанова