Инсантурал къатта-къушливу харж хьусса чаннахсса арцу датIайсса Дагъусттаннал Энергосбытрал идара цакьнива Гъумук буссия. Ва иширал ялув цала харж бувсса чаннащал бавхIусса ва цайми иширттащалсса масъалартту ххал бигьин Ккуллал райондалул жяматран Гъумукун занан багьайва.
КIулсса куццуй, Гъумукун Ккуллал райондалия заназисса муданмасса маршруткагу бакъахьувкун, инсантал ва иширал ялув инжит хъанахъаву дикIайва. Вана утти Ккуллал райондалунмасса идара тIивтIунни Ваччав. На уттигъанну хьунаавкьура ва идаралул бакIчи Гъажаев Исмяил МахIаммадлул арснащал. Ванал бувсуна ттухь укунсса затру.
— Аьмну Дагъусттаннал Энергосбытрал компаниялий дурсса дахханашивурттайн бувну, Ккуллал райондалий Ваччиял шяраву тIивтIуссар жул идара, райондалул налогиртталми иширттаха зузисса идаралул къатраву. Мунияту чаннащал бавхIусса масъалартту щаллу буван бучIан бюхъайссар утти жучIан. Харж бувсса чаннахсса арцу датIаврил иш буссар, цакьнива кунма, графикрайн бувну. ЦIана жул идаралий ур 8 зузала, вайннавату 4 лагайссар шяраваллавух чаннахсса арцу датIан, — бувсуна ттухь Исмяиллул.
