2017-ку шинал дайдихьулий на МахIачкъалалия Лаккуйн, Вихьлив маршруткалий най уссияв. Маршруткалувусса пассажиртураву Гъумукунсса, Ваччавсса бакъахьувкун, машина, ОьхIлилун бияйхту, кияхунмай кIура бавну, Аьхъарахмур ххуллийх бавчуна.
Ганиннин ттахъ-ттухъ тIий най бикIайсса машина ххуйну, хъюлчу къатIий бавчуна цуппагу. Ххал буварча, ххуллу бия ВацIилу зунттул чулуха нанисса ратIаву, кьакьардаву муххал гьартасса бургъурду бивхьуну, хъинну ххуйну бакьин бувну. Ганиннин цахъис хьхьичI ОьхIлилаллил шанбачIулий дацIан дурсса, Кьукуннал шяравасса, Дагъусттаннал Автодорданул хъунама инженерну чIярусса шиннардий зий ивкIсса аьпа биву Аскандар Оьмаровлун гьайкал тIитIин бувкIсса хъамаллурал машинартту хъиннува бигьану наншиврул грейдер гьан дурну дия ххуллийх.
«Ванахха жулами ххуллурдахгу утти аякьа дуллай, бакьин буллай. Буллай бурхха, цуксса захIматну бухьурчагу ЯтIувахъаллийхмур ххуллугу», — тIисса ттул дакIнивусса ххаришиву цакуну дялирчIуна. Му дяличIаву хьуна машина Кьукуннал шяравун кIура баяйсса ххуллияту кIихунмай бачайхту. Шикку кказит буккултрахь, къакIулнан кIул буллай, кIулнан дакIнийн бутлай, бусан ччива укунсса зат. Кьукуннал шяравалу хъанахъиссар Лакрал райондалувун духлахимурну. Ва шяравун кIура баяйсса ххуллучIату 700-800 метра дуссар Хъювхъиял шяравалличIан ва шичча кияхунмай кIура баяйсса, цакьнива бакьин бувсса, ххуйсса ххуллул шанбачIулийн бияннин. Щала ттул ихтилатгу вайнна вай метрардаятуссар. ОьхIлилату Кьукуннал шяравалличIан бияннинсса ххуллу бакьин буван итадаркьуну диркIун дур арцу. На кIицI бувсса шанбачIулийн бияннин дурусну дуссар 10 километра ххуллул. БучIияхха проект дуллалисса, смета дуллалисса чIумал вай на кIицI дурсса метрардугу гивун дичин. Гьай-гьай, бувчIлачIисса зат бур ва ххуллу бакьин буван багьлагьишиврул хъирив Лакрал райондалул хъуними буклай бивкIшиву. Шикку пикри бувсса чIумал дакIнийн бутан багьлай бур ххуллурдал «условнайсса» дакъа зумарду къадикIайшиву. Жула чансса инсантал бусса миллатрал шяраваллурду кувнния кув личIи дуллалаву къахъинни. Мукьахунмай хъуниминнал укунсса ишру тикрал къахьунмур баварча ххуйну хьунссия тIий ура.
