Январьданул 24-нний АьФ –лул Ухссавнил Ккавкказуллал иширттал министр Лев Кузнецовлул ва Дагъусттаннал БакIчи Рамазан АьбдуллатIиповлул каялувшиврулу хьусса совещаниялий ххал бивгьунни ччуччиялул ва энергетикалул комплексрал захIматсса маъалартту.
Рамазан АьбдуллатIиповлул бувсунни ТЭК-рал (Топливно-энергетический комплекс) масъалартту Аьрасатнал Президент Владимир Путиннул ва АьФ-лул ХIукуматрал Председатель Дмитрий Медведевлул контрольданулу бушиву, му бутIувусса даврил кураторшиву дуллай бушиву АьФ-лул Ухссавнил Ккавкказуллал иширттал министерство.
«ЦачIусса хIарачатирттайну жун ччай бур ми давурттал хъин чулийсса хIасиллу дуван», — увкунни Республикалул каялувчинал.
Лев Кузнецовлул бувсунни Дмитрий Медведевлул сипталийну сакин бувсса цIусса комиссиялул хIакъираву.
«Властьрал федерал органнал, регионнал органнал, муниципал органнал, ресурсосберегающий организациярдал, контрольданул органнал, гужирдал структурарттал хIарачатру цалийн буцаву мурадрай Аьрасатнал ХIукуматрал Президентнал хIукму бувссар лавай буван цаппара ведомстварттал цачIусса зузи группалул статус. Мунил хIакъираву жу бавтIун бивкIссару ноябрьданий ва мунин дирзуссар «статус группы при правительственной комиссии» тIисса цIа», — увкунни Лев Кузнецовлул.
Совещаниялий ххал бивгьунни электроэнергиялул бутIувусса тарифрал политикалул масъала. ДР-лул тарифирттал къуллугърал каялувчи Оьмахан Амирхановлул бувсунни муштаритурансса электроэнергиялул багьа тIайланма хъарну бушиву Аьрасатнал ФАС-рал буругаврийн (позициялийн). Гара чIумал «МРСК Северного Кавказа» ПАО-рал вакилтурал бусласимунийн бувну, Дагъустттаннай ишла буллалисса тариф миннан чIивину чIалай бур.
ДР-лул ХIукуматрал вице-премьер Шамил Исяевлул бувсмунийн бувну, цаппара масъалартту чулийн буккан бувну бур, амма электроэнергиялухсса тарифрал чIиви-хъуншиву кIул баврил масъалалул хIакъираву ца пикрилийн къабувкIун бур.
Лев Кузнецовлул Шамил Исяевлуйн ва ДР-лул УФАС-рал каялувчинайн тапшур бунни яла гъансса чIумуву, шикку гьурттуну бивкIсса къуллугъчитал цачIун бавтIун, бяст-ччал багьсса масъалартту ца чулийн буккан буван.
Масъалартту ххал бигьаврил хIасиллу дуллай, Рамазан АьбдуллатIиповлул дакIнийн бувтунни ТЭК-рал бутIувусса буржру так ца кьини хьуну бакъашиву, ми хьуну бушиву ацIрахъул шиннардий. «Мунияту миннуха жува зун аьркинссар, цуксса жунма захIмат хъанарчагу. Му даву бакIуйн дуккан дуван бюхъантIиссар цачIусса хIарачатирттайну», — увкунни ДР-лул БакIчинал.
ХIадур бувссар
ХI. Аьдиловлул
