Январь зурул 24-нний Дагъусттан Республикалул ХIукуматрай хьунни наркотикирттайн къаршисса комиссиялул заседание. Заседание дачин дурну ия ДР-лул ХIукуматрал председательнал хъиривчу Рамазан ЖахIпаров. Шикку ихтилатру хьунни республикалийсса наркотикирттацIун дархIусса тагьардания, миннун ххуллу кьукьин ляхълахъисса чаранная, гьаз бунни «Развитие здравоохранения в Республике Дагестан на 2014-2020 г.г.» хIукуматрал программа щаллу даврил масъала.
А. Аьбдуллаева
Цала ихтилатраву комиссиялул председатель, Дагъусттаннал ХIукуматрал вице-премьер Рамазан ЖахIпаровлул кIицI лавгунни, УФСКН Виваллил иширттал министерствалийн тапшур бувну махъ ва наркоманиялул масъаларттал хIакъиравусса цалчинсса заседание хъанахъишиву.
— Щак бакъар вай дахханашивурттайну наркомания ппив хьун къаритаву мурадрай дуллалисса давуртту хьхьара къахьуншиврий, ялунгума наркоманиялийн къарши бацIансса ххишаласса чаранну лякъиншиврий, — увкунни Рамазан ЖахIпаровлул.
2016 шинал республикалий наркомания ппив хьун къаритаву мурадрай дурсса давурттая ихтилат бунни ДР-лул ЦIуллу-сагъшиву дуруччаврил министерствалул Управлениялул хъунмур Татьяна Беляевал.
Ванил бувсунни подпрограммалий 2010 шинайннин дан ккаккан дурну диркIсса циняв давуртту бартдиргьушиву.
— Жу сакин барду наркотикру ва психотропный затру ишла буллалими сияхIрай бишайсса цасса база. ЦIуллу-сагъшиву дуруччаврил министерствалул республикалул исполнительный властьрал органнащал цачIу дурссар психотропный затру ишла дуллалисса иширттащал, тахсиркаршивурттащал, терроризмалущал ва экстремизмалущал талатаврил, жагьилтал тIайлану тарбия баврил масъаларттан хас бувсса семинарду.
2016 шинал жу итабакьарду медициналул зузалтран кумагрансса методикалул пособияртту ва маслихIатру, школардай дишарду «цIуллу-сагъшиврул» дарсру. Вайннул мурад бур къалиян учаврия жагьилтал арх баву, цIуллу-сагъсса оьрмулийн кIункIу баву, — увкунни цила ихтилатраву Татьяна Беляевал.
Республикалийсса наркотикирттацIун дархIусса тагьардания бусласисса ихтилат бунни Наркотикру ишакаш баврил хъирив бавцIусса управлениялул хъунама Мустангер Муминовлул. Ванал бусласимунийн бувну, 2016 шинал республикалий ялун личин дурну дур наркотикру ишакаш баврицIун дархIусса 3500 тахсиркаршиву. Миннува 2400-нния лирчусса ашкара дурну дур. Хъиривлаявурттайн бувну сукку дурну дур 2467 уголовное дело. Ялун личин дурсса тIулдакъашивурттаву бур наркопритонну тIивтIусса, наркотикру кьюлтIну щурущи бувсса, наркотикру ва психотропный затру ишла дурсса ишру. Ихтиярду дуруччай органнал зузалтрал зерххуну дур аьмну 175 кг. личIи-личIисса наркотикирттал. ФСИН-лул Управлениялул идарарттай хIакьинусса кьини 663 инсан ур наркотикру ишла буллай тIий щябивтсса. Ашкара бувну бур ми идарарттайн наркотикру ласун кьаст лархIусса 6 иш. Управлениялул хъунаманал мукунма бувсунни СКФО-лул субъектирдах бурувгун Дагъусттаннай наркотикру ишла буллалисса ишру яла чансса бушиву.
Заседаниялий ххал бивгьусса масъаларттал хIасиллугу дурну, кьамул дунни 2017 шинал дуллансса давурттал план.
