Январьданул 22-нний Дагъусттаннал БакIчи Рамазан Аьб­дуллатIипов гьуртту хьунни Москавлив «Единая Россия» партиялул XVI съездрал пленарный заседаниялий.

Билаятрай хъуннасса политикалул мероприятие хьун хьхьичI Республикалул каялувчи Рамазан АьбдуллатIипов, ДР-лул Халкьуннал Мажлисрал Председател Хизри Шихсаидов ва ПаччахIлугърал Думалул депутат Бувайсар Сайтиев хьунабавкьунни журналистътуращал.
Рамазан АьбдуллатIиповлул бувсунни съездрай дан тIий бушиву дукIу ссуттил хьусса бувчIавурттал хIасиллу.
«Мунияр ххишалагу, избирательтурал наказирттайн чул бивщуну, дхханаххи дантIиссар партиялул программа. Ттул пикрилий, ххал дигьин хьхьичIун ласун­ссар АьФ-лул Президент Владимир Путиннул Федерал собраниялийнсса Рисала», — увкунни Рамазан АьбдуллатIиповлул.
Республикалул каялувчинал увкумунийн бувну, съездрал гьаз бан аьркинссар патриотшиврул даража ванияргу лахъну. Патриотшиву лозунгирттайну ва оьвчавурттайну къуртал хьун къааьркинссар. Аьркинссар дуллан балжисса давуртту, гьаман мукунсса иш-тагьар дур Дагъусттаннай, хIарачат буллай буру кризисрал тагьарданува буккан.
Журналистътуращалсса ихтилатравух хIала бувххунни Хизри Шихсаидов ва Бувайссар Сайтиевгу.
Съездрал пленарный заседаниялий ихтилат буллай, партиялул председатель, АьФ-лул премьер-министр Дмитрий Медведевлул бувсунни махъсса ххюра шинал мутталий «Единая Россиялул» таман­сса давуртту дурну душиву ва гьарца даву дайсса диркIшиву агьалинал мурадругу хIисавравун лавсун.
«Тамансса давуртту дурссар билаятрал каялувчитуралгу. Партия даххана хъанай дур, жу дузал дуварду цIусса журалул партия, дуварду кадрардал политикалул оптимизация, цIу буккан буварду мунил члентал. Жу дуруччарду жулла лидершиву. Му исват бу­ллай бур махъсса 5 шинал мутталий регионнал кампаниярттал дур­сса хIасиллал, мукунма 2016 шинал Госдумалувунсса бувчIавурттаву ларсъсса ххувшаврил», — увкунни Дмитрий Медведевлул. Ганал мукунма дакIнийн бувтунни, даххана дурну диркIшиву бувчIавурттайн хIадур шаврил низамгу. «Жу буруччарду ва гьарзагу барду депутатътурал корпус чIявуми регионнай. 5 шинал мутталий жул партиялувусса чIявуми ххув хьунни мэртурал бувчIавурттаву, МСУ-рал органнаву хьун барду 70%, мукунма ПаччахIлугърал Думалуву жу бугьарду чIявуми кIанттурду. Ххув хъанан бигьа бакъассар, амма «Единая Россиялул» тасттикь бувссар тIиртIусса ва тIайласса конкуренциялийн хIадурну душиву, жу пахрулийгу буссару ми ххувшавруттая», — увкунни премьер-министрнал.
Дмитрий Медведевлул бувсунни ттинияр шихунмай бан-битанмунил хIакъиравугу.
Съездрай Дагъусттаннай БакIчи Рамазан АьбдуллатIипов увчIунни «Единая Россия» партиялул Высший Советравун.