Аьрасатнал ХIукуматрал Председательнал хIукмулийн бувну, 2016 шинал образованиялуву Аьра­сатнал ХIукуматрал премиярду лавсминнал цIарду рирщунни. Премиялул лауреатътал хьунни Аьрасатнал аьлимтурал 4 группа, миннувагу ца группа – здравоохранениялуву.

Му группагу диплом лавсун мукьахсса образованиялул Аьрасатнал медакадемиялул группа бур (Российская медицинская академия непрерывного последипломного образования), кутIану РМАПО. Аьлимтурал группалул хъунамагу ур 2000 шиная шинай РМАПО-лул стоматологиялул деканну зузисса профессор, медициналул элмурдал доктор, Аьрасатнал лайкь хьусса хIакин, Ибрагьимлул арс Абакаров Сяъдуллагь. Жунма кIулли Сяъдуллагь Ибрагьимович Аьрасатнаву ца яла хьхьичIунма стоматолог-ортопед ушиву, цувагу Москавлив цала клиникагу тIивтIуну зий ушиву. Ххуй­сса клиникалул заллу ушаврицIун, му ххаллилсса аьлимчу, преподаватель ушиву. ТтурчIиял ва Чараваллил, кIира шяраваллил арснал хIукуматрал премия ласаву щалвагу миллатран пахрулунсса ишри. Дагъусттаннал паччахIлугърал мединститут къуртал бувсса Сяъдуллагь Ибрагьимовичлул аспирантуралуву дуклай унува дурурччуну дур элмурдал кандидат хьунсса диссертация. 1993 шинал мунал дурурччусса докторнал диссертация хьуссар СССР-даний муххал керамикалул протезирттал конструктированиялул ва ми ишла баврил цалчинсса давуну. 1994 шинал мунал итабавкьусса «Ккарччал протезирттал ттизаманнул конструкциярду» тIисса учебник чIявусса хIакинтурал-ортопедътурал ва ккарччал техниктурал хъинсса кумагчи хьуссар. Профессор Абакаров Сяъдуллагь ххюттуршунниха лирчусса элмийсса давурттал авторди. Мунал 11 монография ва луттирду итабавкьуссар, ми луттирдавагу 6 лу образованиялул развитиялул Федеральный институтрал (ФИРО) Аьрасатнал вузирдансса учебникру хIисаврай цIакь бувссар. Му бакъассагу, цIанихсса профессорнал 44 учебное пособие итабавкьуссар, му хъанай ур 37 авторский свидетельствардал, патентирдал автор ва соавтор. Мунал каялувшиврийну дурурччуну дур кьуниясса диссертациярду. Профессор Сяъдуллагь Ибрагьимович, медициналул элму хьхьичIуннай дувавриву хъунмасса бутIа бивхьусса аьлимчу ушаврицIун, агьалинал оьрмулул иширттавугу чялишну гьуртту хъанахъисса жяматийсса ишкка­ккур. Му Москавуллал медико- стоматологиялул университетрал ди­ссертационный советрал членни, Аьрасатнал стоматологиялул ассоциациялул «Последипломное образование» секциялул хъунамари, тамансса стоматологиялул журналлал редколлегиялул членни. Ччя-ччяни лагайссар Аьрасатнал личIи-личIисса регионнайнгу, кьатIаллил билаятирттайнгу конференциярдай докладру буван. Дагъусттаннал медициналул академиялул Почетный профессор­ди, мудангу да­гъусттаннал выпускниктурал чIарав ацIаймари, миннал квалификация гьаз дуван курсирдайн гьан бувангу, ординатуралуву ягу аспирантуралуву кIулшивуртту куртIгу, цIакьгу дуван мудан кабакьу буваймари. Дагъусттаннал хIукуматрал мунал гьунарданун ва захIматран лайкьсса кьимат бивщуссар, мунан дуллуссар Дагъусттаннал лайкь хьусса хIакиннал цIа. Аьрасатналмур ХIукуматралгу уттинингу цимилагу кьимат бивщуну бур мунал бюхъу-гьунарданун, му ур Аьрасатнал Федерациялул лайкь хьу­сса хIакин, лайкь хьуну ур «Здравоохранениялул отличник» лишандалун ва «За заслуги перед стоматологией» тIисса цалчинмур даражалул ордендалун. Мукуна лайкь хьуну ур Аьрасатнал здравоохранениялул министр­нал цIаниятусса ХIурматрал грамотарттан.
Жунгу хъуннасса ххаришиву хьунни Дагъусттаннал цIа-кьини адаврай ядуллалисса ва гьаз дуллалисса жулва миллатрал язисса арс Абакаров Сяъдуллагьлун Аьрасатнал ХIукуматрал ларайсса премия дулаву. Жу уттинингу мунал цIаних ва даврих къулагъас дурссия, дуркссар кказитрай Сяъдуллагь Ибрагьимовичлущалсса интервьюрду. Уттигу му Дагъусттаннайн учIайхту мунащал ихтилат бансса хIалу дагьанссар тIисса тамахIрай буру.
Барча вил премия, Сяъдуллагь Ибрагьимович! ЦIуллушиву дулуннав вихьхьун, уттиния тиннай дуваймунивугу тIайлабацIу чIа тIий буру.