Пресс-конференция дачин дурну ия Виваллил иширттал министр Аьвдурашид МахIаммадов. Шикку гьуртту хьунни министрнал хъиривчу, полициялул хъунама Сергей Карпов, Миграциялул масъаларттал управлениялул хъунама МахIаммад МахIаммадов.

Миграциялул масъаларттал хIакъиравусса ихтилат бунни Аьвдурашид МахIаммадовлул. Ванал бувсунни Миграциялул служба МВД-лул биялдарайн бувкIун махъ цала ведомствалун миграциялул масъаларттаха зун багьлай бушиву ва цивппа ми масъалартту агьалинан захIматшивуртту хьун къариртун щаллу бан хIарачат буллай бушиву. Министрнал бувсунни, УФМС-рал къайгъурду МВД-лийн тапшур баврицIун бавхIуну, 30%-рал чан бувшиву управлениялул зузалт.
— Жул агьаммур мурад агьалинангу, цала бигарду багьайкун щаллу бан цIусса подразделениялул зузалтрангу къулайсса шартIру дузал давур. ДачIи шинал дянив республикалий цинявппа миграциялул масъаларттацIун дархIусса хIаллихшиннарду ца кIанай дансса ттизаманнул шартIру дусса къатри дантIиссар.
ЦIу буккан буллай буссар адресное бюро. Ва давугу ца зурувату щаллу хьунссар. Миграциялул службалийн дагьайсса хIаллихшиннарду дуллалийни, агьалинан данну тIий дахшишру дуллалисса кIанттурду хьунабавкьунни. Ми иширттангу ххуллу кьувкьуссар. МарцI бакъасса зузалтгу даврия букьан бувссар. Миграциялул службалул зузалал увкIсса инсаннан ккаккан бан, бувчIин бан аьркинссар документ щаллу бансса куц. Му жул давур. Жул мурад агьали, цала масъалагу чIумуй щаллу бувну, жуятува рязину лагавур. Инсантал азурда къабуллай шайссаксса чIирисса чIумул дянив миннал мурад щаллу бансса чаран лякъин аьркинссар. Агьалинан бигьа-рахIатшиву даву мурадрай чялиш дуккан дан аьркинну дур МФЦ-дащалсса хIала-гьурттушиву. Ца чIавахьулттичIа щаллу шавриву хъуннасса бигьашиву дур. Цал увкIун аьрза чивчуну кьабивтун, кка­ккан дурсса чIумал документрал хъирив учIан бюхълай бур инсаннаща, — бувсунни службалул къайгъурдая Аьвдурашид МахIаммадовлул. Министрнал бусласимунийн бувну, цIусса подразделениялул зузалт хъуннасса хъар лархъун зий бур миграциялул службалул щаллу бан аьркинсса масъалартту чIявусса бушиврийн бувну. Так ца ларгсса шинал чил билаятирттаясса 700 азара инсан увкIун ур республикалийн, сайки микссава республикалиягу лавгун бур. 8 азаруннийн дирсса тIулдакъашивуртту хьуну дур миграциялул законодательство къадуруччаврицIун дархIусса, 50 азаруннийн дир­сса тIулдакъашивуртту дур документру чIумуй къабулаврицIун дархIусса. Ларгсса шинал судрал органнайхчIин республикалия тIайла бувккун бур 1700 чил билаятирттаясса инсантал. Жуламиннал ва цайми билаятирттал инсантурал хIакъираву 120-ннийн дирсса уголовное делорду сукку дурну дур миграциялул закондалул ххуттава був­ккун тIий.
Ларгсса шинал мукунна жула республикалийн зун бувкIсса чил билаятирттаясса инсантал сияхIрай къабавцIусса 2 азарунния лирчусса тIулдакъашивуртту хьуну дур. 100-нния ливчусса ишру хьуну бур жула халкьуннал цачIава чил билаятирттая­сса инсантал зий бушиву кьюлтI бувсса. 32 миллиондалия лирчу­сса аькIри дирхьуну дур закондалул тIалав буллалисса куццуй сияхIрай къабавцIуну республикалий зий бивкIсса цайми билаятирттаясса инсантурай. Миннува 70% лавсун бур.
Мукуннасса аькIри дирхьуну дур багьайсса документру щаллу къабувна цачIава чил билаятирттая бувкIми зузи бувсса жула инсантурайгу.
Жула республикалий так 6 азаруннийн бивсса чил билаятирттал инсантурачIа дур зун­сса патент.
Вай масъаларттацIун дар­хIусса чIярусса давурттив дуллан багьлай бур Виваллил иширттал министерстволийн тапшур був­сса миграциялул службалул зузалтран.