Ларгсса шинал ахирданий Ккуллал райондалул школардай тарихрал дарсру дихьлахьисса учительтурал дянив хьунни райондалул тарихран хас дурсса давурттал конкурс.

Жува яхъанахъисса кIан­ттурдаяту, тIабиаьтраяту, жула дянива бувксса вирттавраяту, чувшивуртту дурминнаяту, ватан дуручлай жанну кьурван дурминнаяту бусласисса чIумал, ялун нанисса никиран пахру багьлагьиссар цала улклул цIа ларайну ларсун бачин. Вай иширттал ватандалул чулийннайсса кIункIу тIавугу, ччавугу хIасул дувайссар.
Учительтурал цала давур­ттаву ккаккан бувну бия 1935-ку шинал Ккуллал район сакин дурния шинмай шиккусса шяраваллал ва инсантурал бивтсса ххуллурду. Гьай-гьай, ганиннинсса тарихгу хъиннува авадансса бивкIун бухьувкун, ганиягу бувсун бия. Конкурсравух гьуртту хьунни ххюва школалул учительтал.
Конкурсрал жямру хьунни укунсса: 1-мур кIану буллунни Ккуллал шяраваллил 1-мур школалул учитель МахIмудов Адамлун, 2-мур кIану – ЧIяйннал школалул учитель Рамазанова ПатIиман, 3-мур кIану – Хъусращиял школалул учитель АхIмадов ШайхахIмадлун.
ХIадур бувссар
ХIажимурад ХIусайновлул