Январь зурул 16-нний ДР-лул Виваллил иширттал министерствалий хьунни ларгсса шинал хIасиллу дуллалисса ва 2017 шинал ци масъаларттаха зунссарив ххал бигьлагьисса гьарта-гьарзасса заседание.

А. Аьбдуллаева
Шикку гьуртту хьунни Да­гъусттаннал БакIчи Рамазан АьбдуллатIипов, ДР-лул Силистталул комитетрал Силистталул управлениялул хъунама Эдуард Кабурнеев, ДР-лул УФСБ-лул хъунама Александр Миронов, ДР-лул прокурор Рамазан Шахнавазов, Нацгвардиялул аьралуннал федерал службалул управлениялул хъунама МахIаммад Баачилов, мукунма МВД-лул центральный аппаратрал подразделениярттал ва ОМВД-лул кIанттул отделлал хъуними. Республикалул ихтиярду дуруччай структурардал даврил жям дуллай, Да­гъусттаннал виваллил иширттал министр, виваллил службалул генерал-лейтенант Аьвдурашид МахIаммадовлул бувсунни республикалий низам дуруччин, жяматрал мюхчаншиву дузал дан, тахсиркаршивурттан ххуллу кьукьин ва МВД-лул системалувусса диялдакъашивуртту дукьан дан ци чаранну лявкъуссарив цала ведомствалул. ХьхьичIми шиннардий кунна, ларгсса шиналгу вайннал хьхьичI ххуттай бивхьусса ма­съала бур терроризмалийн ва экстремизмалийн къарши бацIаву.
Ларгсса шинал региондалий мадарасса кьюлтIну щурущи­сса къачагътурал кьюкьри духлаган дурну дур. Ва даву виваллил иширттал органнал ва Мюхчаншиврул федерал службалул управлениялул зузалтрал цачIу дурну дур. Аьвдурашид МахIаммадовлул бусласимунийн бувну, республикалий чан хьуну дур кIусса, оьхIалсса тахсиркаршивуртту, ярагъ ва пIякь учай­сса затру ишла дурсса тахсиркаршивуртту, мукунма чан хьуну бур ихтиярду дуруччай органнал зузалтрал оьрмурдайн кьаст лархIусса, ивчIанна тIий инсан ивкIусса ишру, ххишалану ашкара дурну дур экономикалул аралувусса тахсиркаршивур­тту. Амма чIяву хьуну бур цуркру ва хъямалашин. Аьвдурашид МахIаммадовлул дакIнийн бувтунни 2016-ку шинал органнал зузалт оьрмулуцIа хьу­сса ишру. Террористурайн данди бавцIуну жан дуллуну дур 18 виваллил иширттал органнал зузалал ва 2 ФСБ-лул зузалал. Му бакъа­ссагу, 45 зузалайн дирну дур щавурду.
Министрнал ихтилат къуртал хьуну махъ, къуллугърал бурж биттур буллай жанну дуллусса зузалтрал аьпалун минутIрайсса пахъ багьаву дунни.
Коллегиялул заседания­лий ихтилат бунни Да­гъус­тта­ннал БакIчи Рамазан Аьб­дуллатIиповлулгу. Республикалул БакIчинал лавайсса кьимат бивщунни республикалул Виваллил иширттал министерствалул даврин.
— На рязину ура виваллил иширттал министр цала коллегахъащал архIал республикалий низам дишин хъунмасса хIарачат буллай ушиврия. Жу цачIу зузисса 4 шинал дянив министрнал диялсса давуртту дунни МВД-лул структура марцI дуккан дурну, цIудуккан дан. Уттиния тихуннай дулланмургу чансса дакъар, — увкунни Рес­публикалул БакIчинал. Рамазан АьбдуллатIиповлул мукунма кIицI лавгунни ихтиярду дуруччай органнал хIарачатрайну республикалул бюджетравун дичлачисса налогру гьарза хьушиву.
— Ва масъалалуву ххуйсса ккаккияртту хьунни цайми ведомстварттащал, мукунма районнал бакIчитуращал хIала-гьурттуну зий бивкIун тIий.
— ХIакьинугу МВД-лул давриву хьхьичI ххуттай бивхьу­сса масъала бур террористурал кьюкьращалсса талатаву. Му даву цукунчIав хьхьара хьун дитан къабучIиссар, — увкунни Рамазан АьбдуллатIиповлул.
Республикалул БакIчинал бувсунни полициялул участковыйтурал форум дансса пикри бушивугу. Миккун депутатътурайн, районнал ва шяраваллал активистурайн оьвчинтIишиву. Дагъусттаннал Силистталул комитетрал Силистталул управлениялун тахсиркаршивуртту ашкара дан кабакьу буллай тIий ва республикалий низам ва законну дуруччаврил цIаний бихьлахьисса захIматрахлу Аьвдурашид МахIаммадовлун дуллунни медаль «Доблесть и отвага».