2016 шинал Дагъусттаннай Антитеррорданул комиссиялул дурсса давурттал хIасиллу дунни ва 2017 шинал дансса давурттал масъала ххал бивгьунни ДР-лул БакIчи Рамазан АьбдуллатIиповлул ва Аьрасатнал ФСБ-лул директорнал хъиривчу, НАК-рал аппаратрал каялувчи, Игорь Сироткиннул каялувшиврулу.
ДР-лийсса АТК-рал (Антитеррористическая комиссия) батIаву тIитIлай, Рамазан АьбдуллатIиповлул бувсунни ларгсса шинал АТК зий бивкIшиву захIматсса тагьардануву. «Мунищала архIал тагьарданул анализрал ккаккан бунни республикалий къачагътал уттигу чялишну къуццу тIий бушиву. Амма, аьмну лавсун, ихтиярду дуруччай органнал хIарачатирттайну ва агьалинал кабакьу баврийну террорчишиврул ишру чан бан бювхъунни, кьюлтI хьуну бивкIсса террорчитурайнгу тамансса щавщи биян бунни», — увкунни ганал.
Рамазан АьбдуллатIиповлул бувсъсса куццуй, республикалий террорчишивурттал иширттайну зарал бивсса инсантал лап чан хьуссар. Оьчулий цIа дурксса цаппара къачагътурал бакIчитал бухлаган бувссар, 200-нная ливчусса къачагътал ва миннал кумагчитал бувгьуссар, 7 боевик хушрай инкар хьун бувссар террорчишиврул иширттая. Гужлан дурссар террорчишиврул асардалу бивкIсса инсантуращалсса, кьюлтIсса бандитътурал щахъаннищалсса, оьрчIащалсса, мачча-гъаннащалсса профилактикалул давуртту. Аьмну лавсун профилактикалул давуртту дачин дурну диркIссар сайки 4500 инсаннащал (2015 шинал – 2500 инсанннащал).
БатIаврий бувсунни мукунма, республикалул цинярда муниципал сакиншиннардий антитеррорданул комиссиярттал дуллалисса профилактикалул давурттаятугу.
НАК-рал (Национальная антитеррористическая комиссия) каялувчи Игорь Сироткиннул бувсмунийн бувну, 2016 шинал региондалий террорчишиврийн къарши буккаврил тагьар цалий дацIавричIан гъансса дия, амма чIуруну личIлай дия.
«Ихтиярду дуруччай органнал цаппара къачагътурал кьюкьрал бакIчитал бухлаган баврийну ва цаппара къачагътурал кьюкьри духлаган даврийну миннал лирчIми кьюкьрал ласу бухIан бунни, терактру чан хьунни», — увкунни ганал.
Амма, Игорь Сироткиннул увкумунийн бувну, цIанасса тагьарданул тIалав буллай бур террорчишивриясса нигьачIавуртту чан хьун дувансса, къачагътурал кьюкьри щаллу шаврил хьхьичIалу кьукьлансса давуртту чялиш дуккан дуллан. Мукунсса тагьар хьун даншиврул аьркинссар личIи-личIисса журардал профилактикалул давуртту гьарза дуван.
БатIаврил хIасиллайн чул бивщуну цIакь дунни 2017 шинайнсса АТК-рал давурттал план, микку хIисавравун лавсунни НАК-рал аппаратрал бувсса маслихIатругу, Антитеррорданул комиссиялул члентурал предложениярттугу.
