Ларгсса нюжмардий Аьрасатнал печатьрал кьини, январьданул 13-нний, МахIачкъалаллал Кировский райондалул бакIчи СалихI СагидовлучIа хьунни республикалул СМИ-лул журналистътуран бахшишру дуллалисса батIаву.
З. АьбдурахIманова
Республикалул хъун шагьрулул районнавасса цаннил бакIчиначIасса батIаврийн оьвкуну бия шинал мутталий ва райондалул администрациялущал дахIаву диркIсса, вайннал даврия гьарта-гьарзану чичлай, буслай бивкIсса СМИ-рдал вакилтурайн.
«Хъунмасса барчаллагь учин ччай бур жу дуллалисса давурттая халкьуннахь буслай бивкIсса, жу дурмуниясса репортажру, макьалартту цала изданиярттай ришлай бивкIсса СМИ-рдал пишакартурахь. Мукунма барчаллагь халкьуннаясса рязибакъашивурттаягу жун баян буллай бивкIшиврухлу. Жува мукун архIал къазурча, цаннал ца чулинмай къюкI-мурчIину зурча, жу дуллалимунил мяъна дакъа­ссар», — увкунни бакIчинал.
Хъирив СалихI Сагидовлул ХIурматрал грамотартту ва яба­цIансса тIутIал кацIру буллунни «Илчи» кказитрал корреспондент Бадрижамал Аьлиеван ва МахIачкъалаллал администрациялул пресс-центрданул управлениялул хъунмур Фатима Аьшурбекован. Кировский администрациялул чулухасса ХIурматрал грамотар­ттан мукунма лайкь хьунни «Дагестан» РГВК-лул информацияр­ттал передачарттал директор Марат ЛухIуев, «ИТАР-ТАСС»-рал Дагъусттаннайсса корреспондент Низами ХIажибалаев, «Дагестанс­кая правда» кказитрал корреспондент Арслан Моллаев, «Дагестан» РИА-лул корреспондент Рустам Къяниев, «Молодежь Дагестана» кказитрал корреспондент Гянджави ХIажибалаев. Мукунма журналистътуран буллунни цала давриву аьркин дувансса кьай-кьуй ду­сса кьуцурттугу.
Хъирив райондалул бакIчи ва журналистътал нацIу-кьацIу­шивурттахунсса чяйлул ссупралух щябивкIунни, шиккугу мюнпатсса ихтилатру гьаз хьунни, хъунмурчIин шагьрулул буруккинттаясса ва щаллу бувансса масъаларттаясса, шагьрулул юбилейрал хьунийн дуван дакIнийсса давурттаясса.