Декабрьданул 20-нний МахIачкъалалив хьунни оьруснал миллатрал инсантурал масъалартталсса байсса Дагъусттан Республикалул ПаччахIлугърал комиссиялул заседание.

Бадрижамал Аьлиева
Заседаниялул агьаммур суалданун хас бувсса «О сохранении этнокультурного пространства в муниципальных образованиях Республики Дагестан как фактор формирования общероссийской гражданской идентичности» тIисса доклад бунни Дагъусттан Республикалул миллатрал политикалул министр, лавай кIицI лавгсса комиссиялул председательнал хъиривчу Татьяна Гамалейл. Ванил бувсунни оьрус маз буруччаврил, машгьур баврил цIаний цилла каялувшиву дуллалисса ведомствалул дуллалисса давурттая. ДР-лул Миллатрал политикалул министерствалул гьарца шинал дуллай бур миллатрал-культуралул журалул хъуни-хъунисса мероприятияр­тту, масалдаран, «Масленица», Славяннал форум (2015 шинал сакин бувсса), мукунна чIярусса цаймигу давуртту Славяннал чичрулул кьинилун ва культуралун хас дурсса. ДР-лул Миннацрал кабакьаврийну «Культура» цIанилусса федерал каналданул хIадур дурну дур передача «Русс­кие в Дагестане». 2016 шинал сакин бувну бур Оьрус мазрал ва культуралул республикалул центр, Къизлардай – «Республиканский казачий центр».
Хъирив махъ лавхъсса Да­­гъусттан Республикалул БакI­чинал Ухссавнил территориал округрайсса вакил Владимир Деревянкол бувсунни аьмну региондалий цукунсса тагьар дуссарив, дакIнийн бувтунни Ухссавнил округ хъанахъишиву оьруснал миллатрал жямат ялапар хъанахъисса кIануну ва ХХ аьсрулул 90-ку шиннардийн бияннин оьруснал региондалун ккаллийну бивкIшиву му кIану, амма му мутталия шинмай, жяматийсса-политикалул ва социал-экономикалул ва цаппарасса цаймигу фактордал гужиралу, байбивхьушиву оьруснал миллат республикалул Ухссавния бивзун нани­сса цалчинсса процесс. Бувсунни Ухссавнил региондалий­сса жяматийсса-политикалул ва социал-экономикалул масъалар­тту щаллу баву мурадрай сакин бувшиву Координациялул совет Республикалул ХIукуматрачIа, мунил мурадругу бур Ухссавнил региондалий цашиву, паракьатшиву дуруччаву, миллатирттал дянивсса къача-къучшивурттан ххуллурду кьукьаву, оьруснал миллат бивзун нанаву дацIан даву. Дагъусттан Республикалул БакIчинал вакилнал ялагу бувсунни республикалий ялапар хъанахъисса халкьуннал ляличIишиву дуруччаву, мукунма жагьилтал ватан ххирану тарбия баву мурадрай дуллалисса культуралул мероприятиярттая, цайми-цайми давурттая.
Республикалул Халкьуннал творчествалул къатлул директор Марита МухIадовал бувсунни Дагъусттаннал миллатирттал культура дуруччаву мурадрай ДР-лул Культуралул министерствалул дуллалисса давурттая, оьруснал миллатрал халкьуннал коллективрдал чIарав бацIаву дуллай Халкьуннал творчествалул къатлул дуллалисса хъуннасса даврия, аьдатравун дагьсса «Масленица», «Слава казачья» ва цаймигу байранная, фес­тиваллая.
«Об утверждении Плана работы Правительственной коми­ссии РД по проблемам русскоязычного населения на 2017 год» ва « Об утверждении Отчета о работе Правительственной комиссии РД по проблемам русскоязычного населения в 2016 году» суаллан хасъсса ихтилат бунни Комиссиялул жаваблувсса секретарь Наталья Евсеевал.
Заседаниялул лагрулий Комиссиялул члентурал ххал бивгьунни оьруснал миллатрацIун бавхIусса цаппарасса цаймигу масъалартту. ХIукму бунни ДР-лул ХIукуматрайн буккан «Поддержка проживающего и возвращающегося в Республику Дагестан русского населения» программа ялун нанисса шинавугу гихуннай дачин дувансса тава­къюращал.