ЦIусса шинал байрандалул хьхьичI гьантрай МахIачкъалаллал 100 оьрчIан кIинттул лаххиялул комплектру дуллунни. Декабрь зурул 23-нний МахIачкъалаллал №11 гимназиялул актовый залдануву хьунни МахIачкъалаллал школардай дуклакисса, ятин­сса оьрчIансса шадлугъ.

П. Рамазанова
Му хIадур дурнугу дия МахIачкъала шагьрулул администрациялул ва КIулшиву дулаврил управлениялул, шагьрулул бизнес- сообществалущал уртакьну. ОьрчIру барча буван бувкIун бия МахIачкъалаллал мэр Муса Мусаев, мунал хъиривчу Запир Алхасов, шагьрулул КIулшиву дулаврил управлениялул хъунама ТIагьир Мансуров ва цаймигу. Школалул фойелуву чIюлу бувсса ёлка бия, мюрщими классирттал оьрчIру ёлкалул лагма хоровод дурну, цIушинал шеърирду ккалай ва балайрду тIий бия. ОьрчIру барча буван бавтIун бия республикалул творчествалул коллективрду, дия магьрал персонажру, Дя­къил Ттаттая тIайла хьуну, Пиръаьн Къарийн дияннинсса, дия мяйжаннугу ххуйсса байран. Ва байрандалул яла хъунмур ххуйшивумур дия ятинсса оьрчIру гъилисса янналул дузал буваву. Шиккува бусан, оьрчIру ла­ххиялул дузал буван хъунма­сса хIарачат бунни оьрчIал буру­ккинтту цивунма лавсъсса Лайли БахIандовал. Гьамин ванил чивчуна «Фейсбукрай» ятинсса 114 оьрчIан ва ахIвал кIюласса кулпатирттавасса 60 оьрчIан кIинттул лаххия аьркинну душиву, оьрчIал янналул размердалсса буллай, курткарду ласлай чялишну сукку хьумургу ва бия. Гьамин ванил бюххансса пост асар хьуну, БИСОМ- ращал (МахIачкъалаллал бизнес- сообщество) дартIуна 340 азарда къуруш арцул. Чумартсса даву дур­сса Лайли БахIандовайн барчаллагьрайминнавух жугу буссару.