Ларгунни ца шин оьрмулул 94 шинаву дунияллия лавгун жула хъунасса аьлимчу Амаев Амир Жабраиллул арс. Ва ия Дагъусттанналгу, Аьрасатналгу цIа ларай гьаз дурсса, жулла хIукумат кьатIаллил душмантурая дуруччинсса давур­ттаха зий ивкIсса аьлимчу.

Дагъусттаннаяту увагу кIия инсан ивкIссар Лениннул премиялул лауреатътал: Расул ХIамзатов ва Амир Амаев.
Уттигъанну оьрмулул 102 шинаву дунияллия лавгунни цамагу хъунасса инсан Владимир Зельдин. Ванал цIа гьаз шаву дайдирхьуну дур дяъви байбивхьусса 1941 шинал, «Свинарка и пастух» тIисса кино ласласи­сса чIумал, га кинораву хIухчил, Дагъусттаннаясса зунтталчунал, роль дургьуну ивкIун ур Зельдин. Вагу жула дагъусттанчунан ккалли уван бучIиссар.
Укунсса инсантуращал жу­чIатура лаглай дур ларай­сса эпохалул чIун. Таний жулла жагьил­сса ник мяйжаннугу дакIнийхтуну вихну дия ялун бучIанмур талихI бусса бикIантIишиврийн, ккаши-мякьлих, ду-дакъашиврух къабурувгун, дуклай бия, зий бия цинявннал талихIрал ва жулла хIукуматрал цIакьшиврул цIаний. Жула Амир Амаевгу хъанай ур 1941-1945 шиннардийсса дяъвилул гьурттучигу, инвалидгу.
Амир Аьрасатнал цIанихсса академиктал И. В. Курчатовлущал ва А. П. Александровлущал Совет Союзрал ПаччахIлугъ дуруччинсса ядерный щит дуллай ивкIссар. Амир Амаевлул агьамсса гьурттушинна дурссар Совет Союзрал щинал лултту дачайсса атомрайсса лодкарду давриву. Ва 20 шинал мутталий Советский Союзрал МАГАТЭ-лул группалул хъунаману ивкIссар. Мукуна Совет Союзрал ва Американал атомный ярагъунниясса буруччаву дуллалисса комиссиялул ца председательну ивкIссар. Амир Амаев хъанай ур чIярусса премиярттал лауреат: Лениннул (1963 ш.), СССР-данул Министртурал советрал (1991 ш.), Атомный энергиялул министерствалул (1990, 2001 ш.), И. В. Курчатовлул премиялул. Техникалул элмурдал доктор, профессор Амаев Амир Жабраиллул арс оьрмулул 90 шин хьуннин зий ивкIун ур Курчатовлул цIанийсса атомный энергиялул институтрал элмийсса каялувчину. Ва хъанай ур ИАЭ-рал лайкь хьусса ветеран, атомрал энергетикалул ва промышленностьрал ветеран, лайкь хьуну ур Да­гъусттан Республикалул элмурдал хIурматрал цIанин, дур ванал цаймигу чIярусса цIарду ва наг­радартту. 1965-1969-ку шиннардий Амаев Амир кIийла увчIуну ур Москавуллал Советрал депутатну ва Москавуллал ца райондалул депутатътурал советрал председательну. Ва ия Моссоветрал элмурдал ва культуралул идарартту бувайсса комиссиялул член.
Амаев Амир бакIчину ивкI­ссар Москавлив Да­гъустта­н­нал Культуралул центр «Дагестан» тIитIаврил. Яла га ЦентрданучIасса Хъунисриннал советрал председательну увчIуну ивкIссар. Цала щалвагу оьрмулий Амаев кумаг буллай ивкIссар, цащава шайсса куццуй, Дагъусттан лавай шаврин. Ванал цимиллагу гьурттушинна дур­ссар МахIачкъалалив, Каспийскалий, Гъумук, ГьунчIукьатIув ва Дагъусттаннал цаймигу кIанттурдай дуллалисса давурттаву. 1996 шинал «Гъази-Гъумучи» суккушиндарал съезд­рай Амаев Амир увчIуссар Хъунисриннал советрал вакилну.
2015 шинал август зурул 19-нний, оьрмулул 94 шинаву, дунияллия лавгссар Аммахъал Жабраиллул арс Амир. Увччу­ссар Москавлив Троекуровский хIатталлив, цIанихсса инсантал буччайсса «Аллея Славылий».
Амирдул оьрму дахчин дакъа ххувшавуртту ласлай най къабивкIссар. ГьунчIукьатIрал школагу къуртал бувну, увхссар МахIачкъалалив механический техникумравун. Дяъви байбишин ца гьантлул хьхьичI, 21-мур июньдалий, 1941 шинал отличнайну техникум къуртал був­ссар. Му къуртал бувайхту, гьан ув­ссар дяъвилул ярагъ бувайсса № 182 «Дагдизель» заводрайн, Двигательстройрайн (цIанасса Каспийск). Тай шиннардий ва дунияллий яла хъунмамур завод бивкIссар, торпедарду дувайсса. 1942 шинал дайдихьулий Амаев Амир увцуссар армиялийн ва Ттуплисуллал шагьрулий аьра­ли училищалул курсант хьу­ссар. Ссуттихунмай 1942 шинал немец, Ростов шагьругу лавсун, кьувтIуну бавчуссар Ухссавнил Ккавкказнавун. Мунийн бувну училищагу кIура баен бувссар личIинусса танкарду кьатI дувайсса батальондалийн. Циняв­ппа курсантътал тIайла бувкссар дяъвилийн. Вайннал батальон тIайла бувкссар Орджоникидзе шагьрулучIасса Алагирдал къума ратIув. 1942 шинал ноябрьданий МоздокрачIа гужсса талатаву диркIун дур, душманнан Грозналлал навтличIан бу­ккансса кьасттирайсса. Декабрьданул ахирданий 1942 шинал Амаевлул взвод талай бивкIун бур СС дивизиялул танкардащал. Вайннан къундалуву окопру дуккан багьну бур. Немецнал танкарду окопрайн лархъун дур, гиву солдат ккуччу буллай, сагъну буна буччинсса кьасттирай. Амирдул талихI хьуну бур, сагъну ливчIун ур, амма ясирну агьну ур. Цинявппа ясир бувсса солдат немецнал, кьюкьа дахIин бувну, бувцуну бавчуну бур. Хьхьувай Ставрополлал крайрай Рог тIисса шяраву, циняв­ппа ца дучраппалав бавкьуну бур. Амирдуща бювхъуну бур щинчIав щуркIал къахьунну чIаравсса дучраппалав уххан. Тиву Амир дучрах уруглагисса адаминал лаивтун ур, щинчIав кIул къахьунну. Хъирив кьини, гай ясир бувмигу бувцуну, немец шяравату лагайхту, га цува лаивтсса адаминал маслихIатрайн бувну, Амир лавгун ур чIаравсса Солдатская тIисса станциялийн. Микку зумащарнийсса къатлуву ца хъамитайпалул ва лаивтун ур, жула ­аьрал бучIаннин. Совет аьрал ялун бивгьуну най, чIал къавхьуну тархъан дурну дур га Ставрополлал район. Ясирну бувгьусса красноармейцынал кьюкьа немецнаща неххал тамур чулийн лахъан дуван къабювхъуну, жулами ялун бивну, га бусса кIанттай цинявппа аьщун бивзун бур. Амир тIурчан, гьарца чулуха ххал увну, яла тIайла ув­ккун ур Краснодарский крайрайн Пашковская тIисса станциялийн. 1943 шинал майрал 8-нний НовороссийскаллачIасса «Голубая линия» тIисса немецнал цIакьшиврийн ххяв­ххун нанисса талатавриву Амирдуйн кIусса щаву дирну дур, ванал талихIиндаран, ва агьну ур МахIачкъалаливсса механический техникумрал общежитиялия бувсса госпитальданийн. Хъунмасса хIаллай хъин хъанайгу ивкIун, Амир комиссоват увну ур, инвалидшивугу дуллуну. Яла зана хьуну ур цува зий ивкIсса «Дагдизель» заводрайн. Август зуруй 1945 шинал ув­ххун ур Москавуллал МИФИ-лувун, га къуртал бувну махъ, 1950 шинал, зун ивкIун ур Атомный энергиялул институтраву И. В. Курчатовлущал ва А. П. Александровлущал.
Амир Амаев лайкь хьуссар чIярусса наградарттан:
Орденну: «Отечественной Войны» цалчинмур даражалул, «Трудового Красного Знамени», «Дружбы» ва цаймигу.
Медаллу: «За Отвагу», «За трудовое отличие», «За Победу над Германией в Великой Отечественной войне» ва цаймигу.
Гьашину декабрь зурул 28-нний Жабраиллул арс Амир Амаевлун бартлагантIиссия 95 шин. Мунал юбилейрайн ххуй­сса бахшишну хьунссия, Дагъусттаннал чулуха МахIачкъалаллал цания ца кучалун ганал цIа дизарча. Лениннул премиялул лауреат, физик-атомщик Амаев Амир Жабраиллул арс лайкьссар му цIа дизан.
Арсен Буйдалаевич ХIусайнов, профессор, Москавуллал «Дагъусттан»
культуралул центрданул
президент,
Даниял Шяъбанович
Шяъбанов,
Москавуллал «Дагъусттан» культуралул центрданул
президиумрал член
Бищун хIадур бувссар
А. Аьбдуллаевлул