Лакку улча цIубуккаврил цIаний зузисса «Гъази-Гъумучи» жяматийсса фондрал сипталийну ва Лакрал райондалул кабакьаврийну август зурул 20-нний дайдирхьуну, ноябрь зурул ахирданийннин най дуссия турнир «Лакку кIанттул лига».

Муний гьуртту хьу­ссар 30 шяраваллил командартту: Гъумучиял, Буршиял, Шахьуйннал, ЦIуссалакрал, Вихьуллал, ЦIуссаккуллал, Кьукуннал, Къяннал, Ххутрал, Хъусращиял, Дюкъуллал, Ялув ЧIатIлухъиял, Ххюлуссуннал, КIулушацIрал, ДучIиннал, ЧIяйннал, Гьуйннал, КIундиннал, ЧIарттал, Бархъаллал, ЦIувкIуллал, Ккуллал, ТIулизуннал, Читтурдал, Уручуллал, ЧукIуннал, ЦIу­ссачIурттащиял, ЧIуртта­щиял, Чапаевкаллал, Гьамиящиял – сайки 400-ннийн бивсса жагьилтал гьуртту хъанай бур бяст-ччалливу. Му бакъассагу, миннахлу буклан букIлакIимигу хIи­сав барча, сайки 1000-ннийн бив­сса лакрал жагьилтал цачIун­май бунни ва проектрал. ТIуркIурдугу хьунни лавайсса сакиншиндарай. Дурну дия гьарца командалул герб. ЦIанакул ми гербру жагьилтал цала-цала машинарттайнгума лачIун дуллай бур
Шиккува кIицI бан, «Гъази-Гъумучи» фондрал сипталийну ттининнингу хьуссар мини-футболданул кIива проект. Ин­тту хьуссия «Лакку кIанттул кубок». Турнирданул агьаммур мурадну мунил сакиншинначитал ккаклай бур лакрал шаннагу райондалул ва цайми миллатирттал дянив ялапар хъанан нясив хьусса лакрал щархъал жагьилтал цачIунмай баву, миннаву цIуллусса оьрмулул образ машгьур даву. Муний гьуртту хьуссия 40-нния лирчусса командартту. Ххув хьуссия Читтурдал команда. Муния махъ «Лакку кIанттул кубок» хьуссия Москавлив, билаятрал хъуншагьрулий ялапар хъанахъисса лакрал жагьилтал кувннан кув кIул баву, миннал дянив дусшиву, уртакьшиву цIакь даву мурад­рай. 10 команда гьуртту хьусса турнирданий ххув хьуссар Хъусращиял команда.
Кьинигу лахъину, гьавалул тагьаргу ххуйну дуссаксса, командартту хьунадакьлай дия ЦIуссачIурттащиял школалул футболданул майданний. Кьинигу кутIа хъанай, дяркъугу хъанай дайдирхьукун, тIуркIурду буллан бивкIуна МахIачкъалалив «Фаворит» спортшколалий. Финалданийн дурккуна 10 команда: Ккуллал, ЦIуссачIурттащиял, ЦIуссаккуллал, Хъусращиял, Кьукуннал, КIундиннал, Бархъаллал, Читтурдал, Ялув ЧIатIлухъиял ва Ххутрал. Лавгсса бигьалагай гьантрай хьунни финалныйсса матчру ва миннул хъирив хьунни ххув хьусса ва хьхьичIунсса командарттан бахшишру дуллалисса шадлугъгу. Муний гьуртту хьунни Лак­рал райондалул бакIчи Юсуп МахIаммадов, ДР-лул БакIчинал кадрардал политикалул управлениялул каялувчи Артур Исрапилов, Халкьуннал Мажлисрал хъунаманал хъиривчу Камил Давдиев, Халкьуннал Мажлисрал депутат Амирхан Амирханов, ишбажаранчи Марат Илиясов, Шяраваллил хозяйствалул министерствалул управлениялул каялувчи Эмил Ттаттаев, Лакрал райондалул судрал хъунама Мирза Аьлиев, Ккуллал райондалул бакIчинал хъиривчу МухIуттин Чаринов ва цаймигу.
Шадлугъ дачин дурну ия «Гъази-Гъумучи» фондрал ца яла чялишсса уртакь Ися Бархаев.
Шадлугъ тIитIлай, Лак­рал райондалул больницалул хъунама хIакин, «Гъази-Гъумучи» фондрал хъунама АьбдурахIин Дибировлул кIицI лавгуна хъунисса мурадру турнирданул хьхьичI къабивкIхьурчагу, агьаммур мурадну хъанахъишиву ттизаманнул шартIирдаву жагьилтурал социум сакин даву, миннал цала оьннасса чIун мюнпатну, цIуллу-сагъшиврунгу хайрну гьан дулланшиврул. Жунма кIулсса иш бия, лакрал жагьилтал кувнная кув ябувцун бия. Ва проектрайну жуща бювхъунни мигу цачIун бан, лакрал шаннагу райондалиясса бакъасса, проектраву гьур­ттуну буссия Ахъушиял ва Рутуллал районнаясса жагьилталгу.
Ххув хьуминнан бахшишругу дуллай, «Лакку кIанттул лига» проектрал агьамшиврия ихтилатру бувна Юсуп МахIаммадовлул, Артур Исрапиловлул, Амирхан Амирхановлул, Марат Илиясовлул, Камил Давдиевлул, Мирза Аьлиевлул.
Ххув хьунни Ккуллал команда, 2-мур кIану бувгьунни ЦIуссачIурттащиял командалул, 3-мур кIану – ЦIуссаккуллал командалул.
Ххув хьусса командарттан буллунни «Гъази-Гъумучи» фондрал чулухасса кубокру, дипломру ва арцуйнусса бахшишру.
«ВИП Карго» ООО-лул директор Аьлиев ХIасаннул 1-мур кIану бувгьусса командалун цала чулухагу дуллуни 150 азарда къуруш.
Мува куццуй дуллунни ялагу 14 хасъсса бахшиш: «Лучший игрок» — КIундиннал командалувасса Оьмаев Даниял; «Лучший вратарь» — Хъусращиял командалувасса Ттаттаев Салман; «Лучший защитник» — Читтурдал командалувасса Кьурбанов Маллалази; «Лучший бомбардир» — ЦIуссачIурттащиял командалувасса Аьлиев Аьли; «Лучший нападающий» — Ялув ЧIатIлухъиял командалувасса ХIажиев Аят; «За вклад в Лигу Лакии» — Шахьуйннал командалул капитан ЖахIпаров Руслан; «Самый полезный игрок» — Кьукуннал командалувасса Кулаев Амир; «Самый опытный игрок» — Дюкъуллал командалувасса Уруджев Физули; «За волю к победе» — Бархъаллал команда; «Приз зрительских симпатий» ларсунни ЦIуссаккуллал командалул; «Лучший организатор команды» хьунни Ккуллал командалул капитан Аьлиев ХIасан; Лига тIивтIусса команда – Ххут­рал команда; «За профессиональное судейство» номинациялуву бахшишру дуллунни проект наниссаксса хIаллай гьарцагу матчру ларайсса пишакаршиврий гьан дурсса цинявппагу судьятуран.
«Лайкьсса жагьилтал тарбия баврихлу» тIисса номинациялуву грамотартту ва хъамакъабитулунсса бахшишру дуллунни хьхьичIунсса кIанттурду бувгьусса командарттал оьрмулул бугьарасса инсантуран: Кьурбанов МахIаммадлун (Ккуллал команда), Адамов Темирбулатлун (ЦIуссачIурттащиял команда), МахIаммадов Русланнун (ЦIуссаккуллал команда).
Проектрал каялувчи ур ТIулизуннал шяравату­сса Аьлиев Исмяил. Ва цува ур хIакин. Дагъусттаннал медакадемия къуртал бувну зий ивкIун ур Москавлив. Тиха увкIун дачIи шин дурну дур Лакрал райондалул больницалий хирургну зий. ЦIанакул, МахIачкъалалив ивзун, «Целитель» поликлиникалий хирургнугу зий, Дагъусттаннал паччахIлугърал медицинский колледжравугу дар­сру дихьлай ур. Жаваблувшиву хъуннасса даврий зий ухьурчагу, Исмяил чялишну зий ур жяматийсса иширттахагу.
«Жува лак укунмагу чан­сса буру. ЧIявуми дунияллийх кIама бивщуну, ватандалия ябувцун бур. Цайми районнай, цайми миллатирттал дянив ялапар хъанахъимигу лакрая ябувцун бур. Му бакъассагу, махъсса шиннардий, жунма чIалачIисса куццуй, жула жагьилтал хъяврин бансса, ххуттава буккан бан­сса сававртту чIяру хъанай дия. Лякъин багьлай бия ми иширттан ххуллу кьукьинсса чаранну. Спортрал тIурча жагьилтал цачIунмайгу буллалиссар, миннаву дусшивугу цIакь дуллали­ссар, цIуллу-сагъшиврунгу мюнпатссар. Гьарца ххуллун кьини 9.00 ссятрая 18.00 ссят хьуннин 30 шяраваллил командалувусса жагьилтал, миннал тIуркIулух бурган букIлакIисса миннал гъан-маччами, дустал, гьалмахтал букIлай бур цала оьрчIащал. Хъун хъанахъимигу кувннащал кув кIул хъанахъиссар. Му бакъасса, ва бяст-ччаллийн хIадур хьуншиврул, нюжмардий кIийлва бухьурчагу, цивппагу хьунабакьлай бур шагьрулуву. ЧIяруми командартту цачIун дурссар гьамин «Лакку кIанттул кубокрал» проект сакин байхту. Муниннин так цаппарасса шяраваллал дакъа командартту дакъая.
Турнир лавгунни лавай­сса сакиншиндарай, кувннащал кув бавкьуну, бувчIа-къабувчIавуртту къархьуну.