Гьарцагу шинал ноябрьданул махъра-махъсса алхIат кьини кIицI лагай Ниттил кьини. Му кьинилун хасъсса шадлугъ хьунни ноябрьданул 25-нний МахIачкъалалий Республикалул Оьрус мазрал ва культуралул центрданийгу, «Женщина, чье имя Мать» цIанилу. Шадлугъ хьунни ва Центр бивхьусса Дусшиврул къатлуву, зал-студиялуву.

Бадрижамал Аьлиева
Ва кьини шиккун оьвкуну бия чIявусса оьрчIру бусса ниттихъайн: Людмила Комаревцевайн (7 оьрчI), Наталья Лысовайн (7 оьрчI), Елена Типаковайн (6 оьрчI), Анна Каликинайн (4 оьрчI).
Шадлугъ дайдихьлай, ихтилат бунни Центрданул директор Лариса Кукановал. Ванил ниттихъул барча бунни ва Кьинилущал.
— Зу, хIурмат бусса ниттихъул, дуллай буру ва аьрщарай яла бусравмур, яла аьркинмур даву – зу тарбия буллай буру дакIру хъинсса, захIмат ххирасса, аькьлу-кIулшилул ва мяърипатрал бувччусса оьрчIру – хасну укунсса инсантал буккайссар чIявусса оьрчIру бусса кулпатирттавасса оьрчIая. Жун ччива зу жула центрданул ччя-ччясса хъамалну, дусталну, — увкунни Лариса Борисовнал.
Шадлугъ дачин дурсса студенткахъал бувсунни Ниттил кьини Аьра­сатнаву дуллай байбивхьушиву 1998 шиная шинмай, амма нажагьссаннан бакъа къакIулшиву мунил гьану бивзшиву Баку шагьрулул №228 школалул оьрус мазрал ва литературалул учитель Эльмира ХIусайновал 1988 шинал октябрьданул 30-нний – муна му кьини дурну дур Ниттил кьинилул байран цалчинна цалчин. Муния тиннай Эльмира Жавадовнал цила дуклаки оьрчIащал гьар шинах дайсса диркIун дур му байран, цал Бакуй, яла, Ставрополлайн бивзун махъ, Ставрополлай. Му хъинсса аьдат машгьур хьуну дур билаятрал цаймигу школардай ва щалва билаятрай официальнайну му Кьини цIакь дуваннин кIицI лагайсса диркIун дур гьар шинах Ниттил кьини.
Центрданий Ниттил кьинилун хасну дуллалисса шадлугърал бусравсса хъамалну бия ДР-лул Халкьуннал Мажлисрал депутат, Миллатирттал дянивсса арардал, жяматийсса ва диндалул сакиншиннардил иширттал комитетрал председатель МахIаммад-Кьади ХIасановлул кумагчи Мустапа МахIаммадов ва ДР-лул Миллатрал политикалул министерствалул миллатрал отделданул начальник Александр ХIажиев. Минналгу цала чулуха Ниттил кьинилущал барча бунни хъами.
Махъру лавхъун махъ ккаккан дунни ххаллилсса концертрал программа. ДГУ-рал филологиялул факультетрал студентътурал – ва Центрданул волонтертурал хъинну асар хьунну дурккунни ниттихъахасса С. Викуловлул, А. Бартол, Э. Асадовлул, С. Есениннул, Н. Буровал ва цаймигу шаэртурал назмурду. БавтIминнайн яла-яла асар биян бунни Эдуард Асадовлул «Мне уже не 16, мама» ва Наталья Буровал « Я сына родила не для войны» назмурдал. Ва кьини цаппара студентка­хъал дурккунни ниттиха цала чирчуми назмурдугу. МахIачкъалаллал Г. ХIасановлул цIанийсса музыкалул училищалул студенткахъал увкунни личIи-личIисса балайрду, кла­ссикалул журалул ва уттизаманнул. БавтIми цила балайрдайну мукунма ххари бунни МахIачкъалаллал ОьрчIал филармониялий дуклаки­сса Алина Барановал. Ва чIава балайчи Центрданул дуллалисса сайки гьарцагу мероприятиялий гьур­тту шайссар.
Ахирданий чIявусса оьрчIру бусса ниттихъан дуллунни Оьрус мазрал ва культуралул центрданул, ДНЦ РАН-далул Тарихрал, археологиялул ва этнографиялул институтрал элмийсса секретарь Юлия Лысенкол чулухасса бахшишру, тIутIал кацIру, мукунна депутат МахIаммад-Кьади ХIасановлул чулухасса арцуйнусса бахшишругу.