Ноябрьданул 26-нний Дагъусттаннал Промышленностьрал ва машлул министерствалий хьунни Турциянал промышленностьрал зонардал вакилтуращалсса хьунабакьаву.
КIивагу чулухаллил ххал диргьунни кIивагу региондалул промышленностьрал, инвестициярдал, машлул каширду ва кIивагу регион мюнпатну хIала-гьурттуну зун бюхъаврил хIакъиравусса масъала.
Хъамаллурахь аьла-ссалам бувну махъ, Дагъусттаннал ХIукуматрал вице-премьер ХIасан Идрисовлул увкунни: «Жу ххариссару зу Дагъусттаннал ва Аьрасатнал иширттах къулагъас дуллай бушиврия. ЦIана жул билаятрал кьатIаллил билаятирттащалсса политика чан-кьансса чIурусса тагьарданий дур, амма, му мукуннугу, бизнес лядуккан дуллан аьркинни. Жу хIарачат буллай буру Дагъусттаннайн инвестициярду дучIан дуллансса тагьар щаллу дуван. Шикку жу дузал барду аьркинсса законшивурттал гьану, мунил щаллу дуллантIиссар инвестортурансса хIаллихшинну ва къулайшивуртту, аьмну промышленностьрал ва аграрий производстварду лядуккан дуллансса шартIру.
Республикалул промышленностьрал ва машлул министр Юсуп Умавовлул увкумунийн бувну, металлоконструкцияртту дайсса цIусса завод бувссар «Алмар Каспиан» ЗАО тIисса Дагъусттаннал ва Турциянал хъуннасса инвестициярдал проект бартдигьаврил лагрулуву. Министрнал бувсунни мукунма, предприятие баврин хъунмасса кумаг бувну бушиву ЦIуссалакрал райондалул бакIчи МахIаммадхIажи Айдиевлул, ванал бучIан бувну бур цIусса инвесторталгу.
Юсуп Умавовлул бувсунни ва заводрал хъуннасса мяъна дикIан тIий душиву республикалул экономикалул личIи-личIисса бутIран-промышленностьран, строительствалун, машлул иширттан.
ДР-лул Минпромторграл каялувчинал бувсунни региондалул инвестициярдал ва промышленностьрал каширдаяту, дузрайн дуккан дуллалисса проектирдаяту, Дагъусттаннал ва Турциянал дянивсса дахху-ласулул лагрулия.
Масалдаран, махъсса 3 шинай республикалий дузрайн дуккан дурну дур 28 инвестициярдал проект, миннувату 16 промышленностьраву. Щаллу бувну бур 6 азарва зузи кIану, промышленностьрал дуккан даймунил лагрурду кIилий гьарза хьуну дур.
«КIира шинал мутталий жу щаллу барду 5 индустриялул парк. Ми бувсса кIанттурдай дур дачIрасса аьрщи, тикку Турциянал инвестортураща бюхъанссия цалла производство дачин дуван, инвестициярду дишин», — увкунни Юсуп Умавовлул.
Турциянал чулухасса вакилтурал бувсмунийн бувну, Истамбуллая арх бакъасса Гебзе шагьрулул райондалийсса промышленностьрал зоналий бувну бур 189 фабрика, тикку зий ур сайки 25 азара инсан. Та промзоналул дуккан дайсса хъуслия чил билаятрайн нанимур (экспорт) хIисавну дур Щалва Турциянал экспортрал 4%.
Та промзоналий буккан буллай бур машинартту, машинарттал луртан бутIри, интернет электроника, компьютерду, телефонну, смартфонну, дукия, пластмасс, электричествалул кьай-кьуй.
КIилчинмур промышленностьрал зоналий, Бирлик тIисса кIанай, дузал дурну дур химиялул продукциялул производство 63 гектарданий. Тикку щаллу бувну бур 5 азарва зузи кIану.
Турциянаву цинявппагу бур 297 промзона, ми цачIун бувну бур ассоциациялувун, каялувчину ур промышленностьрал зоналул правлениялул председатель Гебзе Вахит Йилдирим.
Хьунабакьаврил ахирданий ХIасан Идрисовлул Турциянал делегациялул вакилтурахьхьун буллунни ДР-лул Инвестициярдал паспорт ва республикалул инвестициярдал проектирдал каталог.
Турциянал хъамаллурал бувсунни махъунмай цалла ватандалийн зана хьувкун, хъунисса промзонардавун бухлахисса фабрикарттал каялувчитурахь бусан тIий бушиву Дагъусттаннайсса инвестициярдан хасну дурсса шартIирдая. Ми дакI дарцIуну бур Турциянал бизнесчитал республикалийн бучIаншиврий хIала-гьурттусса фабрикартту буллан.
