Ноябрьданул 20-нний ДР-лул Ишбажаранчишиврул ва инвестициярдал агентствалул каялувчи Башир МахIаммадовлул «ТIиртIусса власть» проектрал лагрулий бувсунни республикалийсса инвестициярдал ва ишбажаранчишиврул иширттал хIакъираву.
ХIасан Аьдилов
Б. МахIаммадовлул увкусса куццуй, ва Агентство сакин дурну дур гьашину ДР-лул БакIчинал ХIукмулийн бувну.
«Агентствалий ишбажаранчитуран ва инвестортуран кумагран ва миннал ихтиярду дуруччин щаллу дурну дур щалла инфраструктура. Масалдаран, жул ведомствалий зий бур Гарантиярттал фонд, чIиримур ва дянивмур ишбажаранчишиврул субъектирдансса микрофинансированиялул фонд, ишбажаранчитуран кумаграл центр ва экспортран кумаграл центр», — увкунни МахIаммадовлул. Ганал мукунма бувсунни республикалий зий бушиву 5 бизнес-инкубатор.
Агентствалул каялувчинал бувсмунийн бувну, гьашину сакин бувну бивкIссар цIуну байбихьлахьисса ва ца шин хьуннин зузисса бизнесчитурансса грантирдал конкурс. Коррупция къахьуншиврул ва конкурс аьчухсса, циняннан тIиртIусса хьуншиврул заявкарду кьамул дуллай бивкIссар многофункциональный центрданийхчил. Яла заявкарду ххал дурссар конкурсрал комиссиялул, мивунгу бувххун бивкIссар жяматийсса организациярдал, ихтиярду дуруччай органнал, министерстварттал ва ведомстварттал вакилтал. Грантру ларсун дур сайки 500 инсаннал. Миннан личIи дурну диркIссар 123 млн. ва 350 азарда къуруш, миннувату 116 млн. ва 350 азарда къуруш федерал бюджетравату дуркIссар, 7 млн. къуруш – республикалул бюджетравату.
«Сайки грантирттал дачIи личIи дурну диркIссар шяраваллил хозяйствалул бутIувусса бизнес-проектирдан кумагран, кIилчинмур кIану бугьлай бур хIаллихшинну даврил бутIул проектирдал, шамулчинмур кIану – производствалул бутIувусса проектирдал», — увкунни МахIаммадовлул. Ганал мукунма бувсунни Агентствалул конкурсру баян бувну бивкIшиву чIиримур ва дянивмур бизнесрал муниципал программарттал давурттан арцу личIи даврин. Ганий ххув хьуну бур 7 муниципалитет, субсидияртту диркIссар цинярдагу 16 млн. ва 650 азарда къуруш.
Башир МахIаммадовлул бувсунни мукунма инвестициярдал иширттаятугу. Ганал увкумунийн бувну, махъсса 3 шинал республикалул основной капиталданувунсса инвестициярду сайки кIилий ххишала хьуну дур ва дукIу ми диркIун дур 231 млрд. къуруш. 2016 шинал 6 зуруй республикалул основной капиталданувунсса инвестициярду хьуну дур 45 млрд. къуруш, ми дукIумур шинал вара чIумалнияр 1,8 процентрал ххишалассар.
Пресс-конференциялий Агентствалул бакIчинал жавабру дуллунни журналистътурал суаллахьхьун.
