Ноябрьданул 30-нний премьер-министр Аьбдуссамад ХIамидовлул каялувшиврулу хьунни ДР-лул ХIукуматрал заседание.
Республикалий вилттили оьрчIал ва ниттихъал литIаву чан шаву мурадрай дуллалисса давурттал хIакъираву ихтилат бунни ДР-лул цIуллушиву дуруччаврил министр Танка Ибрагьимовлул. Ганал бувсмунийн бувну, вилттили оьрчIру литIаву чан шаву мурадрай цIакь буллай бур нинушиву ва оьрчIшиву дуруччаврил учреждениярттал материаллал ва техникалул база, гьарта-гьарза буллай бур ниттихъан ва оьрчIан медициналул кумаг баврил лагру, миннувух лавайсса даражалул технологиялулссагу.
Министрнал бувсунни мукунма республикалий щаллуну бакъашиву акушеркахъал койкарду. «МахIачкъалалив цIуну буллалисса Перинатальный центр хIисав бувну бур 150 койкалун. Га центр зун бивкIукун Дагъусттаннай акушеркахъал койкарду щаллуну бикIанссар», — увкунни Ибрагьимовлул.
Министрнал бувсмунийн бувну, вилттили оьрчIан ва лавайми оьрмулул оьрчIан ччясса мутталийсса (экстренная помощь) кумаг булланшиврул «ДРКБ» ГБУ-рай зий бур хьхьугу-кьинигу зузисса консультативно-реанимационная бригада цалла хасъсса транспортращал.
Ми давурттайн бувну, гьашину 9 зурул мутталий республикалий перинатальсса литIавуртту чан хьуну дур 18,7 процентрал.
Аьбдуссамад ХIамидовлул увкусса куццуй, цIуну буллалисса Перинатальный центр хъанахъиссар агьамсса социал объектну, мунияту тиккусса пациентътуран щаллу дуван аьркинссар хъинну къулайсса шартIру.
«Экономика чаннайн дуккан даву» тIисса приоритетсса проект бартдигьаврил хIакъираву ихтилат бунни ДР-лул ХIукуматрал Председательнал хъиривчу – ДР-лул экономикалул министр Раюдин Юсуфовлул.
Ганал бувсмунийн бувну, 2016 шинал ДР-лул цачIусса бюджетравун дуркIун дур 26,7 млрд. къуруш налогирттал, ми хъанай дур пландалул 102,4%. КIанттурдал бюджетирттавун налогирттал доходирттал пландалул ялунбихьуртту биттур бувну бур 98,8%.
Гьашину 10 зурул мутталий ашкара бувну бур сайки 54,6 азараксса инсантал захIматрал кьутIирду къачирчуна зузисса. Ишбажаранчишиврул объектрай зий ивкIун ур сияхIрайн къалавсна зузисса 5890 инсан. СияхIрайн лавсун ур 3003 ишбажаранчи. Ххал бувну бивкIссар ишбажаранчишиврул сайки 15 азарва объект.
Масъала ххал бигьаврий ихтилат бунни ДР-лул Налогирттал къуллугърал управлениялул каялувчи Оьмахан Жабраиловлулгу.
