Декабрьданул 12-нний Дагъусттаннал БакIчи Рамазан АьбдуллатIипов гьуртту хьунни Аьрасатнал ХIукуматрал Председатель Дмитрий Медведевлул каялувшиврулу видеоконференциялул журалий дуллалисса селектороданувухсса совещаниялий. Совещание хас дурну дия ниттил ва оьрчIал цIуллушиву дуруччаврил масъаларттан.
«Махъсса 25 шинал мутталий жула билаятрай ниттихъул литIаврил ккаккия чан хьуну дур мукьва бутIул шанма бутIуяргу ххишалану. ЦIанасса ппурттуву га ккаккия хъанай дур 100 азарва сагъсса оьрчI бувминнул 10-ннияр чансса ххишаласса. Ми циняв шиннардий 5 шинавун бияннинсса оьрчI литIаву чан хьуну дур сайки шанма бутIул кIива бутIаксса. ДукIусса шинал хIасиллайн бувну, вилттили оьрчIру литIаврил даражалул дазу дур сагъну бувсса 1000 оьрчIавату 6,5 ивкIусса. Гьашинусса 10 зурун хасну мура ккаккия дур цахъисгу ххуйсса – 5,9,» — увкунни премьер-министрнал.
Дмитрий Медведевлул мукунма дакIнийн бувтунни, 2008-2015 шиннардий билаятрай бувну бивкIшиву 25 перинатальный центр, гания махъ цIанасса чIумалнийн бувну бушиву 32 центр. Ганал мукунма бувсунни ва шинал ахирданийннин бувну бакIуйн буккан бан най бушиву уттигу 5 перинатальный центр – Дагъусттаннай, Кабардин-Балкарнаву, Алтайрал ва Красноярскаллал крайрай, Брянскаллал областьрай.
АьФ-лул ЦIуллушиву дуруччаврил министр Вероника Скворцовал бувсмунийн бувну, билаятрай цIанасса ппурттуву лякьлувусса хъанний буллай бур шинай 500-я ливчусса операцияртту. Ванияр ца 5 шинал хьхьичI мукунсса операцияртту нажагьсса бакъа къабайссия, шинай 10-15-ваксса операция.
ДакIнийн бутанну, «Модернизация здравоохранения Республики Дагестан на 2011-2016 годы» тIисса паччахIлугърал программалул лагрулуву декабрьданий МахIачкъалалив тIитIин най бур 150 тах бусса перинатальный центр, мунийну бюхъантIиссар ялун хьунтIисса ниттихъан медициналул кумаг ххуй бан. 2015 шинал Дарбантлив зун бивкIссар 50 койка бусса оьрчI бай къатта ва Хасавюртлив – «Республикалул перинатальный центр» ГБУ 50 тах бусса.
Муданма лавай буллай буссар акушер-гинекологтурал, педиатортурал ва неонатологтурал пишалул даража республикалул ва федерал центрдай. Махъсса 2 шинай пишалул даража лавай бувну бур 193 хIакиннал.
