Декабрь зурул 11-нний МахIачкъалаливсса Хъун мизитраву хьунни МухIаммад Идавс (с.аь.с) увсса рабиуль-авваль зурул савлугъ дуллалисса республикалул мавлуд. Шикку гьуртту хьунни республикалул хъунама Рамазан АьбдуллатIипов.

П. Рамазанова
ХъатIан чак бувну мукьах Дагъусттаннал муфтиятрал кьиб­лалул территориал округрай­сса вакил Магьди Аьбидовлул барча бунни циняв рабиуль-авваль барз бучIаврищал. Мизитравун бавтIцири ва Дагъусттаннал жямат барча буллалисса ихтилат бунни шариаьтрал элмурдал доктор, цIанакул Дагъусттаннал исламрал университетрал аспирантуралуву дарсру дихьлахьисса, Дамаскалиясса шафиит мазгьабрал правовед Мус­ттапа Диб аль Бугалгу. Ванал бувсунни ва барз бусурманнан хъуннасса байранну хъанахъисса барз бушиву, Идавсиха (с.аь.с) эбадат дуллай, дуаьрдай, мюнпатранну гьан бувангу аьркиншиву. Дагъусттаннал муфтий, щайх АхIмад-хIажи Аьбдуллаевлулгу кIицI лавгунни гьарцагу диндалул инсантуран эбратну хьун аьркиншиву МухIаммад Идавс (с.аь.с). « Ислам – хъиншиврул ва хъинбалдарал ххуллийсса динни. Инсантуран жувува ххуймур, хъинмур хIисав хъанай бухьурчанни ми жулла диндалух ххуй чулий буруглантIиссагу», — увкунни муфтийнал цалва ихтилат къуртал буллай. Дагъусттаннал агьалинан цIуллушиву, нахIушиву чIа тIутIисса дуаь дунни аьлимчу-динчи ХасмухIаммад Абубакаровлул. Мавлидрай гьур­тту хьунни динийсса идарарттащал зузисса Комитетрал хъунама МахIаммад АьбдурахIманов, Халкьуннал Мажлисрал Элмулулсса ва культуралулсса буллалисса комитетрал хъунама Ражав АьбдуллатIипов, муфтиятрал вакилтал, жяматийсса ишккаккулт ва динчитал.