Декабрь зурул 21-нний МахIач­къа­лалив, Свято-Успенский кафедральный соборданул территориялий тIивтIунни рувхIанийсса просветительский центр «Ккавкказ – дакьаврил къаттар».

П. Рамазанова
Ва мероприятиялий гьуртту хьунни Республикалул БакIчи Рамазан АьбдуллатIипов, Миллатирттал ишир­тталсса буллалисса федерал агентствалул хъунама Игорь Баринов, Дагкомрелигиялул председатель МахIаммад АьбдурахIманов, МахIачкъалаллал ва Грозныйлул епископ Варлаам, Да­гъусттаннал муфтиятрал ва ягьудинал общинардал советрал вакилтал, цайми республикардаясса хъамал. Да­гъусттаннал БакIчинал кIицI лавгунни цIуну тIивтIусса центр православиялул кIулшивуртту цIакь дуллалисса, тарихийсса, рувхIанийсса гьанурду ва культуралул мархри лахьхьайсса кIану хьунтIишиву, Аьрасатнал ва Дагъус­ттаннал халкьуннал аьдатругу лахьхьай­сса кюру хьунтIишиву. Игорь Бариновлулгу кIицI лавгунни ва цIуну тIивтIусса духовно-просветительский центр, личIи-личIисса миллатирттал ва диннал агьлу бавкьуну, нахIуну яхъанахъисса уникальныйсса республикалул оьрмулуву агьам­сса ишну хъанахъишиву. «Ттун ва центрданувун, так ххачпараснал диндалул агьлу бакъагу, цайми миллатирттал ва диннал агьлугу зананссар тIисса умуд бур, цачIу-чIаравсса чIаххуврал культура ва аьдатру кIулну дикIан аьркинссар», — увкунни федерал чиновникнал. Центр шанна зивулийсса бур, шиву бикIан тIий бур бигьалагай кьинисса школа ва жагьилтурансса центр, мукунма жагьилтуран ва оьрчIан тарбия дулавриву нитти-буттахъан ва педагогтуран консультация хIисаврайсса кумаг буллалисса службагу.