Декабрьданул 20-нний Дагъусттаннал БакIчи Рамазан Аьбду­ллатIипов гьуртту хьунни «Конституция как гарант стабильности и защиты общечеловеческих ценностей» тIисса Аьрасатнал элмулул ва практикалул конференциялий . Га хас бувну бия ДР-лул Конституциялул судран 25 шин шаврин.

Шадлугърал батIаврий гьур­тту хьунни мукунма ДР-лул Конс­титуциялул судрал председатель МахIаммад Халитов, Башкортосттан Республикалул, Ингушетия Республикалул, Кабардиннал ва Балкарнал Республикалул, Ухссавнил АьсатIиннал республикалул Конституциялул судрал председательтал.
Миннал хьхьичI ихтилат буллай, Рамазан АьбдуллатIиповлул бувсунни ванияр 25 шинал хьхьичI Да­гъусттаннай сакин бувну бивкIшиву Конституциялул суд, ва хъанай бушиву конституциялул низам суд­райну дуруччаврил орган, инсаннал ва гражданиннал гьануми ихтиярду ва тархъаншивуртту дуруччаврил орган, мукунма щалла республикалий ДР-лул Конституциялул тIайланмасса иш бачин баврил орган.
«Конституциялул суд хIасул шаврищал архIал дузал хьуссар республикалул паччахIлугърал властьрал органнал системагу. ПаччахIлугърал система сакин хьу­ссар законодательный, исполнительный ва судирттал къяртрая. Ччясса чIумуву Конституциялул судрал тасттикь бувссар ганил хъуннасса социал мяъна душиву», — увкунни Рамазан АьбдуллатIиповлул.
Дагъусттаннал БакIчинал тIимунийн бувну, судрай зий бу­ссар бусравсса, оьрмулулгу, давур­тталгу опыт бусса инсантал.
Яла ихтилат бунни ДР-лул Конституциялул судрал председатель МахIаммад Халитовлул. Ганал бувсунни ДР-лул Конституциялул суд­рал давурттая.
Муния махъ республикалул Конституциялул судрал зузалтран дуллунни ДР-лул паччахIлугърал наградартту. Судрал председательнан Рамазан АьбдуллатIиповлул дуллунни медаль «За доблестный труд».
Планерсса заседаниялий ихтилатру бунни цайми регионнаясса хъамаллуралгу.
Яла Башкортосттаннал Респуб­ликалул ва Дагъусттан Республикалул Конституциялул судирттал дянив чирчунни хIала-гьурттуну зуншиврул хIакъиравусса кьутIи.