Вай гьантрай ЦIусса шинал байрандалул хьунийн МахIачкъалаллал хъун майданнив нахIу-нацIушивуртту, кофе, чяй дахлансса палаткарду – «избушкарду» бихьлай, унгу-унгусса хIадуршинна най дур.
ЧIал къавхьуну майданнив буккантIиссар оьрчIан дялахърурду дуллантIисса аниматортал, хъунисса ссихьри, дякъил ттатахъул ва марххаладушру. Мукунма занантIиссар паровозру, пIайтIунну ва цаймигу дялахърурду. Шагьрулул мюрщултран щурунтIиссар аттракционну ва кIирисса дукра дукан бюхъантIисса кIанттурду. Вай гьантрай «Ленинград» гостиницалучIа тIиртIуну дур дуки-хIачIиялул ярмаркарду ва шагьрулул кIичIирттаву зий бур елкарду бахлахисса базарду.
Шагьрулул бакIчи Муса Мусаевлул маслихIат бувну бур цала пишакартурахь елкарду бахлахисса базаллал ялув бацIан, цанчирча микку жула шиччасса ттарлил мурхьру бахлахисса ишругу хьунабакьайсса буну тIий. ЦIана шагьрулул майданнив хъунмур елка бихьлай, махъра-махъсса давурттив лирчIун дур. Шагьрулул бакIчинал мукунма амру бувну бур елкалул къаралданийсса полицейскийтурангу кIирисса дукра дукансса кIанттул дузалшинна дуван.
Декабрьданул 21-нния тIайла хьуну шагьрулий ялапар хъанахъисса ятинсса, маэшатрал кIюласса кулпатирттавасса ва мушакъатсса оьрчIансса аьдатравун дагьсса «Елкалул» утренникру ва чирилул шадлугъру дуллай байбивхьуну бур. Мукунна дувантIиссар хIасиллу дуллалисса «Спортсмен года» премиялул шадлугъ ва жагьилтурансса балл.
Вай шадлугъирттал бакIщаращуйсса шагьрулул майданнив Хъун елка тIитIлатIисса шадлугъгу хьунтIиссар декабрьданул 24-нний ссят 17.00. хьуну. Му кьинилия гихунмай декабрьданул 30-ннин майданнив хъуниминнансса ва мюрщултрансса ЦIусса шинал байрандалун хасъсса мюзикллу бихьлантIиссар.
