Ноябрь зурул махъра-махъсса алхIат кьини кIицI дувайсса Ниттихъал кьинилун хасну республикалий чIярусса мероприятияртту хьунни нинухъру барча буллалисса, бюхттул буллалисса.

А. Аьбдуллаева
Давриву ва жяматийсса ишир­­ттаву хьхьичIунсса, ххуй­сса оьрчIру тарбия бувсса ни­ттихъайн оьвкусса шадлугърай­сса батIаву хьунни Ккурккуллал шяравугу. Мунил сиптачитал ва сакиншинначитал хьунни шяраваллил Культуралул къатлул художествалул каялувчи Аймисай Аьбдуллаева ва библиотекарь Сияли Аьбдуллаева.
Нинухъру барча буллай ихтилат бунни Аймисай Аьбдуллаевал.
— ХIакьину ва жула шадлугърайн оьвкусса хъами цинявгу хъунмасса захIмат бивхьу­сса, оьлувкъусса заманалул мугьалттухьхьун бириян къабивтун, тIайласса тарбиягу дуллуну, цала-цала оьрмулул ххуллийн оьрчIру бивчусса нинухъру бур. ХIакьину шикку бур, чIярусса шиннардий школалий зий, цалами оьрчIацIун, цимирагу никирал оьрчIан кIулшивуртту ва тарбия дуллусса учительтал, гьарица кулпатраву хьунадакьай­сса захIматшивурттах къабурувгун, бувчIу-къабувчIурдайхгу ках куну, кулпатру бурувччу­сса яхIлувсса хъами. Вайннал аькьилшивугу, насихIатругу, оьрмулул опытгу ишла буллан аьркинссар хIакьину жагьилсса ник тIайлану тарбия дан, жула оьрчIру бяйкьу ххуллийн къабуккан. Ниттихъал кьинилуцIун дархIуну щалагу билаятрай ларгсса мероприятиярттал чIалачIи бунни цуксса бияла буссарив ниттихъахь. Ниттил махъри яла бюххаймургу, яла асар шаймургу.
Гьарица ишираву нитти­хъал махъ бачин бан аьркиншиву, ми жяматийсса давурттавух гьур­тту буллан аьркиншиву бувчIлай бур. Жува сайки циняв буру чIявусса оьрчIру бусса кулпатирттаву хъуни хьусса.
Ниттихъал хIурмат буну, хъунаманал чIивиманах аякьа дуллай аьдат бувну бияв жува. ХIайп, хIакьинусса кулпатир­ттаву ца-ца, кIи-кIива бакъа оьрчIру бакъар. Ци чулийгу, жува хIарачат бан аьркин­ссар миннаву ирсирай нанисса хха­ллилсса жула аьдатру тарбия дан, хъунанал хIурмат бан, чIивинаха аякьа дан лахьхьин бан, — увкунни цила ихтилатраву Аймисай Аьбдуллаевал.
Хъирив шикку гьуртту хъанахъиминналгу оьрчIру тарбия баврил, жула культурагу, аьдат­ругу дуруччаврил хIакъираву цала-цала пикри бусласисса ихтилатру бунни.
Ниттихъан тIивтIунни нахIу-нацIулул авадансса ссупра.